Besëlidhja, futboll për... qejf
Kamara: Nuk rrezikojmë asgjë, por duam fitoret për të kënaqur tifozët e zhgënjyer
Besëlidhja nuk i ka ndalur për asnjë moment përgatitjet për ndeshjen e radhës që do të luajë në shtëpi ndaj Erzenit. Një takim, ku objektivi i vetëm mbetet fitorja, edhe pse në garën për ngjitjen në Superiore nuk ndryshon asgjë, pasi lezhjanët tashmë janë dorëzuar totalisht. Megjithatë, futbollistët kanë deklaruar se do të respektojnë deri në fund garën dhe do të luajnë për fanellë. Besëlidhja kishte shpresa për të sfiduar në javët e mbetura të kampionatit Kastriotin e vendit të parë, por ajo humbje që pësoi në Rrogozhinë ishte vendimtare që shanset për një gjë të tillë të shuheshin. Për këtë arsye, skuadra po mendon për sezonin e ardhshëm, ku objektivi do të jetë i njëjtë, ashtu si në këto 10 vite të kaluara. Drejtuesit pritet të ruajnë grupin e futbollistëve dhe të përforcohen në merkato, në mënyrë që të mos e diskutojnë rikthimin në elitën e futbollit shqiptar. DEKLARATA Mesfushori me tipare sulmuese, 20-vjeçari nga Guiena, Oumar Turad Kamara, që po mbyll sezonin e dytë me fanellën e Besëlidhjes, për "Panorama Sport" është shprehur: "Ndonëse Besëlidhja tashmë ka dalë edhe praktikisht nga objektivat dhe rregullorja, nuk na rrezikon edhe nëse i humbim të gjitha sfidat, ne përsëri po punojmë intensivisht për të marrë ngarkesat e duhura nga të gjitha pikëpamjet. Duam që pjesën e mbetur të kampionatit ta shijojmë sikur të ishim në garë, kjo na kënaq jo vetëm ne, por më shumë tifozërinë, të cilën e kemi zhgënjyer. Duke iu rikthyer
sezonit të shkuar, ne ia dolëm që ta mbyllnim me pikë të barabarta me skuadrën që u ngjit, por një gabim i mëparshëm na detyroi që të luanim këtë sezon në këtë nivel. Tani që gjithçka ka marrë fund për pretendimet tona, ne përsëri do të jemi kërcënues për skuadrat pretendente. Besëlidhja ka treguar se është një ekip që rikuperon mjaftueshëm edhe në çastet e fundit. Tani jemi të fokusuar në sfidën ndaj Erzenit që po e vlerësojmë maksimalisht, pasi duam që ta fitojmë, ashtu siç e kemi zakon, para tifozërisë sonë", ka përfunduar Kamara.