Dridhet Siti, Reali do Sterling
Brenda majit presin firmën, i rrisin rrogën nga 180 mijë paund në javë në 270 mijë
Mançester Siti po përgatitet për të nisur bisedimet për rinovimin e kontratës me Rahim Sterling. Sulmuesi anglez, i cili u transferua nga Liverpuli për 49 milionë paund në vitin 2015, ka shënuar 20 gola dhe dhuruar 11 asiste këtë sezon në të gjitha kompeticionet dhe pritet të shpërblehet me një kontratë të re, për të mbajtur larg edhe Realin e Madridit, një nga klubet e interesuara për talentin. Sipas "ESPN", "qytetarët" duan që ta kenë firmosur kontratën e re në maj, pasi të jenë shpallur edhe kampionë. Kontrata e 23vjeçarit do edhe dy vite që të skadojë, por ai është emri i radhës në listën e Pep Guardiolës për t'u blinduar, pasi është
firmosur me Kevin De Brujnen, Fernandinjon, David Silvën dhe Nikolas Otamendin gjatë muajve të fundit. Sterling paguhet me 180 mijë paund në javë në Mançester dhe sipas "Mirror"-it, oferta e re e sheikëve pritet të jetë 270 mijë paund në javë (një rritje rroge prej 50%). Firma me një prej talenteve të trios sulmuese të teknikut katalanas është thjesht një formalitet.
Plani B i Realit - Skuadra spanjolle, e cila këtë sezon mund ta shpëtojë vetëm duke triumfuar për herë të tretë radhazi në Champions, ëndërron transferimin e Nejmarit nga PSG-ja në verë për rolin e sulmuesit të krahut (Bejl pritet të largohet). Por presidenti i Realit, Florentino Perez, po has në rezistencën e sheikëve të kampionëve të Francës, që për ta transferuar yllin brazilian në "Parc des Princes", verën e shkuar i paguan klauzolën e prishjes së kontratës me Barcelonën (222 milionë euro), duke e bërë futbollistin më të shtrenjtë në histori. Por në rast se "O Ney" nuk do të rikthehet në La Liga, atëherë Plani B i kampionëve të Europës do të jetë Rahim Sterling. Problemi i "galaktikëve" është se kanë vendosur të bëjnë biznes me dy prej klubeve më të pasura të Europës, të cilat nuk e kanë problem të refuzojnë edhe shifrat më të çmendura që kampionët e Europës mund të jenë gati që të paguajnë. Zinedin Zidan e ka pranuar që në kohën kur Sterling luante në "Anfield Road" se ishte një tifoz i stilit të lojës së talentit nga Xhamajka dhe në letër ai duket një objektiv më i mundshëm se i pari.