Juventus-Milan, Alegri: Sot vendoset titulli

"Me Bonuçin s'ka hatërmbetje, por mbetet një kundërshtar"

Momenti më i rëndë sishëm i sezonit ka mbërritur. Masimiliano Alegri e di mirë dhe për këtë arsye ai vendos të grumbullojë të gjitha copat që ka në dispozicion të këtij Juventusi. Për trajnerin bardhezi, fakti që të martën do të ndeshen me Realin e Madridit në çerekfinalet e Ligës së Kampionve, nuk kërkon që të jetë një shpërqendrim, përkundrazi.

Alegri, cila është gjendje e Kielinit dhe Kuadrados?

Kielini është mjaft mirë dhe do të luajë nga minuta e parë. Edhe Kuadrado ka shfaqur një formë mjaft të mirë, ndaj kundër Milanit do të jetë me ne në pankinë. Shumë shpejt do të rikuperojnë të gjithë, sepse pa dyshim prilli është muaji, i cili do të na thotë nëse do të mund të jemi protagonistë deri më 27 maj ose jo. Pas Milanit, deri në duelin kundër Napolit na ndajnë 7 ndeshje. Ky është një moment që duhet përballuar me entuziazëm. Të bësh në dy vite 224 ndeshje nga 227, nuk është keq, apo jo?

Do të mendoni për Milanin apo për Realin e Madridit?

Jemi ende shumë të nervozuar për dy pikët e lëna ndaj Spalit. Në 10 ndeshjet e fundit kemi grumbulluar 8 fitore dhe 2 barazime. Juve- Milan është gjithmonë e njëjta histori, një ndeshje e ekuilibruar. Për Realin do të mendojmë nga e hëna. Në ato 180 minuta kundër madrilenëve do të luajmë përballë më të fortëve në botë, ndaj diçka e tillë duhet përjetuar për diçka globale, madhështore, siç e do sfida. Por dua të nënvizoj që objektivi ynë primar është Seria A dhe kaq.

Si e arsyetoni takimin e Dibalës me Simeonen në Madrid?

Shpresoj që në fund të ketë qenë Simeone, ai që e ka paguar faturën... Ajo që mua më intereson është që Dibala të bëjë një fundsezoni madhështor dhe jam i bindur për këtë. Fundja, vetëm në këtë mënyrë mund të fitojë biletën për në Botëror dhe mendoj se do të shkojë.

Me Realin përpara është e pamundur që të mos mendoni për këtë sfidë. Si do të rreshtoheni në mesfushë?

Nuk do të bëj aspak llogari. Nëse kërkoni të dini për Kielinin, ua konfirmoj se do të jetë në fushë me Milanin nga minuta e parë. Ndërsa mesfusha do të varet mbi të gjitha nga sulmi.

Kur ju themi Bonuçi, çfarë ju kalon nëpër kokë?

Natë speciale. Ai i ka dhënë shumë Juventusit dhe anasjelltas.

Verën e kaluar bëri një zgjedhje të vetën, por ai ka mbetur në zemër të tifozëve dhe është shumë i lidhur më "bandën" Bufon-Barzalji-Kielini. Gjithsesi, nesër (sot) do të jetë një rival dhe do të trajtohet si i tillë.

Ka ende hatërmbetje mes jush dhe Bonuçit?

Kur u largua, u tha se mbrojtja jonë u dobësua, ndërkohë që pamë një rritje të Benatias dhe Ruganit. Nuk ka hatërmbetje mes nesh. Episodi i Portos ndodhi për të mirën e tij dhe të të gjithë grupit. Ishte një vendim i drejtë dhe me Leonardon kam një marrëdhënie

të shkëlqyer. Vendimin për t'u larguar nuk e prisja, por e respektuam të gjithë.

Na thoni një anekdotë mes jush dhe Gatuzos? Jeni sqaruar?

Më mbetet t'i bëj vetëm komplimentet për lojën dhe rezultatet e shprehura. Sqarim mes nesh nuk ka pse të ketë... Në 2010-ën, unë i kërkova që të bëhej pjesë e stafit tim dhe të largohej nga futbolli. Ai kërkoi që të vazhdonte, por vetëm 3 muaj më vonë dha lamtumirën. Kujtoj që përpara derbit, shkova në dhomën e tij dhe i thashë se do të shkonte në tribunë. Ai u tërbua, ishte një moment shfryrjeje.

Dhe të mendosh që ua dhuroi Gatuzo fitoren në Torino, në vitin e titullit...

Xhixhi përtoi që të zgjaste duart. Ishte një goditje me "çorape" e Rinos, por shumë e rëndësishme për fitoren finale të kampionatit.