Duro: S’jemi më të fortë se Kukësi, por do t’i mundim

“Pauza na ndihmoi, gjykimi një gangrenë për ne”

Shpëtim Duro kërkon vetëm fitoren ndaj Kukësit. Në konferencën e djeshme për shtyp, trajneri paralajmëroi se skuadra e tij do të rikthehet fuqishëm për të realizuar misionin "Europë". Edhe pse nuk e pranon që skuadra e tij është më lart se verilindorët, duket se i jep moral fakti që këtë sezon historia i favorizon.

Profesor, si e shikoni ndeshjen me Kukësin?

Pas një pauze rikthehet kampionati me një ndeshje shumë të rëndësishme për ne. Janë ndeshje përcaktuese për ne si me Kukësin, ashtu edhe me Skënderbeun. Po ashtu edhe ndeshjet e Kupës së Shqipërisë, që do të vendosin shumë për objektivin tonë.

Pas krizës së rezultateve, mendoni se do të vijë fitorja pikërisht nesër (sot)?

Situatën na e ndërlikuan në ndeshjet e fundit. Në këto javë që kanë mbetur, duhet që të marrim maksimumin. Nëse duam që të realizojmë objektivin "Europë" nëpërmjet kampionatit, kjo është forma e vetme.

Mendoni se ka ndikuar pozitivisht ndërprerja e kampionatit?

Ndërprerja na shërbeu shumë për kthimin e disa futbollistëve dhe pati kohë rikuperimi. Ndikoi mirë për rikthimin e Nurkoviç, Tunkarës, afër është edhe Muarem. Na mungon vetëm Xhufo. Një mungesë është më se normale. Unë e kisha thënë që me Kukësin skuadra do të ishte më e plotë. Pres shumë nga kjo skuadër.

A ka ndonjë pikë më të fortë se Kukësi Flamurtari juaj?

Më të fortë, nuk mund të themi. Kukësi është kampioni në fuqi, skuadër me investime në lojtarë cilësorë, por edhe ne jemi treguar të fortë, madje në përballjen me Kukësin, pavarësisht se kemi arritur dy ndeshje barazim, ishim pranë fitores. E rëndësishme është që skuadra të japë maksimumin, pasi tani kemi organikë të plotë.

I druheni gjykimit në këto ndeshje të mbetura?

Gjykimi është bërë gangrenë për ne. Nuk kemi kohë për të humbur. Të përqendrohemi te ndeshja me Kukësin dhe ta fitojë takimin ajo skuadër që do e meritojë në fushën e lojës.

Luhet në Vlorë, cili është mesazhi për tifozët?

Patjetër që tifozët na kanë mbështetur. Ne i kemi zhgënjyer

periudhën e fundit dhe u kërkojmë falje. Ishte një pjesë e mirë e sezonit, por në ndeshjet e fundit kemi gabuar shumë. Shpresojmë që përkrahja e tifozëve të ndikojë pozitivisht për pjesën e mbetur të kampionatit, por edhe për ndeshjet e kupës.