120 mijë franga borxh, Shkumbinit i hiqen tri pikë
Klubi peqinas i detyrohet All Boys në Argjentinë, zyrtari Isaji: Penalizim në momentin e gabuar
Shkumbini merr një goditje të rëndë nga FIFA në këtë moment të rëndësishëm të sezonit. Sikur të mos mjaftonte forma e keqe dhe situata e paqëndrueshme me trajnerët, por tashmë peqinasve u zbriten edhe tri pikë nga klasifikimi. Vendimi është zyrtarizuar dje nga FSHF, ndërsa është marrë nga Komisioni i Disiplinës së FIFA-s. Kjo çështje ka të bëjë me mosshlyerjen e detyrimeve të Shkumbinit ndaj klubit argjentinas Atletiko All Boys në lidhje me lojtarin Federico Mazur. Ky i fundit u bashkua me peqinasit në fillim të sezonit 2013, qëndroi për një vit dhe u aktivizua në tetë ndeshje. Në atë kohë, lojtari ishte 20 vjeç, ndërsa klubi All Boys pretendon shumën që i takon si ekipi ku është formuar lojtari. Gazeta ka mësuar se bëhet fjalë për një shumë rreth 120 mijë frangash zvicerane, të cilat Shkumbini duhet t'i shlyejë klubit argjentinas ku është formuar mbrojtësi. "Federata Shqiptare e Futbollit është njoftuar për vendimin më të fundit të Komisionit të Disiplinës në FIFA për çështjen e klubit Atletiko All Boys kundër klubit të futbollit Shkumbini, lidhur me kompensimin për trajnim të lojtarit Federico Mazur. Për shkak të moszbatimit të vendimit të marrë nga Komisioni i Disiplinës i FIFA-s më datë 7 shtator 2017 nga ana e klubit të futbollit Shkumbini, është implementuar menjëherë nga FSHF pika 4 e vendimit, duke i zbritur klubit të Shkumbinit 3 pikë nga klasifikimi aktual në kampionat. FSHF-ja, pasi ka përcjellë vendimin te klubi i futbollit Shkumbini, i bën me dije marrjen e masave të menjëhershme për shmangien e penaliteteve të mëtejshme në rast moszbatimi sërish", thuhet në njoftimin e FSHF-së. Klubi peqinas duhet të shlyejë shumën në fjalë për të mos rrezikuar më tej në penalizime të tjera. REAGIMI - Ndërkaq, në një reagim për gazetën, shefi i klubit peqinas, Astrit Isaji, u shpreh: "Është një kontratë e bërë më 2013-ën, kur unë nuk kam qenë shef klubi. Megjithatë, ajo që na shqetëson, është momenti i papërshtatshëm në të cilin na janë hequr pikët. Federata të na lajmëronte më parë dhe të na i hiqte pikët për kampionatin e ardhshëm, por jo tani. Është një penalizim që na dëmton shumë dhe i padrejtë". F.Ahmeti