Bylis luan gjithçka në Berat

Bylis do të luajë sot në Berat ndaj Tomorit vendës në ndeshjen e radhës në kampionat. Ballshiotët rikthehen të luajnë pas pushimit që kishin javën e kaluar. Në takimin e sotëm, ekipi i drejtuar nga Daniel Sadedini luan për gjithçka. Madje, përballja e sotme mund të vendosë shumë për sa i përket gjithë sezonit. Bylisit i bën punë vetëm fitorja në ndeshjen e sotme në Berat. Në rast se munden, atëherë diferenca me Tiranën mbetet 7 pikë, çka do të bënte që gara për vendin e parë të mbyllej në njëfarë mënyre. Edhe barazimi i shkon për shtat bardhebluve që shkojnë në + 6 nga Bylis. Tirana është pushim këtë javë, ndërsa Bylisin e pret një transfertë e vështirë në Berat ndaj Tomorit vendës. Një takim i fortë ku ballshiotët janë nën presionin e rezultatit. I vetmi avantazh i Bylisit është se ka pasur kohën e mjaftueshme për të përgatitur këtë ndeshje. Tekniku Sadedini do të ketë të gjithë lojtarët në dispozicion për këtë takim dhe do të synojë medoemos fitoren. Ekipi dje ka zhvilluar seancën e fundit stërvitore dhe më pas është grumbulluar për të qenë gati për takimin e sotëm ndaj Tomorit. Ballshiotët gabuan dy javë më parë në fushën e tyre duke barazuar me Pogradecin, gjë që i largoi më shumë nga Tirana që vazhdon të kryesojë. Bylis ka ndryshuar katër trajnerë deri tani në këtë sezon, ndërsa ka pasur luhatje për sa u përket rezultateve. Megjithatë, në ekip shpresojnë te vendi i parë deri në fund. Por, fillimisht duhet të kalojnë transfertën e Beratit që është shumë e vështirë.