Juve-Real, “Zonja” eksperte e sfidave dopio
Në 8 raste, 5 herë kalojnë italianët, 3 madrilenët
Nuk ka dyshime se finalja e humbur vjet në Kardif, kundër Realit të Madridit, ishte një tjetër plagë e thellë për Juventusin, duke qenë se prej 21 vitesh, Liga e Kampioneve është shndërruar në një tabu për ta (suksesi i fundit në 1996, kundër Ajaksit, me penallti). Gjithsesi, fati donte që sërish, bardhezinjtë dhe Reali i Madridit të viheshin përballë njëri-tjetrit, në çerekfinale dhe mundësia për hakmarrje ekziston, edhe pse në lojë nuk është asnjë trofe, thjesht bileta për të avancuar në raundin e ardhshëm. Për skuadrën e Masimiliano Alegrit, mundësia për të synuar finalen e tretë në katër sezonet e fundit, kalon pikërisht nga dueli me spanjollët. Për këtë arsye, motivimi do të jetë maksimal, këtë herë për 180 minuta, jo vetëm për 90. Dhe nëse i bazohemi statistikave dhe përballjeve historike mes Juves dhe Realit, kur bëhet fjalë për një dopio sfidë, ata që duhet të jenë më të frikësuar duhet të jenë Ronaldo me shokë. Historia tregon se në 8 raste, 5 herë kanë mbizotëruar bardhezinjtë kundrejt 3 herëve të "merengeve", ndërsa në dy finale teke, kanë qenë iberikasit që kanë triumfuar (vitet 1998 dhe 2017). Por le të hyjmë në detaje:
Sezoni 1961- 1962 - Luheshin çerekfinalet e Kupës së Kampioneve. Dueli i parë në Torino sheh Realin fitues, 10, ndërsa në Spanjë, ndeshja e kthimit përfundoi me të njëjtin rezultat, por për italianët. Rregullorja e asaj periudhe nënvizonte se duhej të luhej një ndeshje shtesë, në fushë neutrale dhe në Paris, Reali fiton 3-1 dhe eliminon Juven. (Bilanci total, 1-0 për Realin)
Sezoni 1986-1987 - Kupa e Kampioneve ndërron format dhe luhen direkt ture eliminatore. Në të dytin, Juvja dhe Reali përballë njëra-tjetrës. Në Madrid fitojnë të zotët e shtëpisë, 1-0, por në Torino, në kthim, Juventusi kthen reston, sërish 1-0. Ndryshe nga vitet
më parë, në fuqi hyjnë kohët shtesë dhe penalltitë me spanjollët që kualifikohen pas 11metërshave 3-1. (Bilanci total, 2-0 për Realin)
Sezoni 1995/96 - Pas gati një dekade, me kompeticionin që nga Kupa e Kampioneve riafirmohej në Ligën e Kampioneve,
Juventusi dhe Reali i Madridit përballen mes tyre në çerekfinale ( ashtu sikurse sivjet). Bardhezinjtë që në fund të turneut do të ngrinin edhe trofeun, e nisin keq, duke u mundur 1-0 në Spanjë (gol i Raulit). Por në kthim, "Zonja e Vjetër" përmbys 2-0 me gola të Del Pieros e Padovanos dhe kështu ata shkojnë në Romë ku ngrenë trofeun e dytë të historisë. Shumë i veçantë është fakti që në të vetmen herë që Juve-Real janë ndeshur në çerekfinale, me bardhezinjtë që kanë eliminuar madrilenët, në fund
fituan edhe trofeun. (Bilanci total, 2-1 për Realin)
Sezoni 2002- 2003 - Gjysmëfinalet e Ligës së Kampioneve, një ndër 180 minutëshat më të bukur të historisë së Juves. Në "Bernabeu" u mposhtën në vajtje 2-1, ndërsa në kthim kishte festë dhe zhgënjim sepse ndërsa Del Piero dhe Trezege përmbysnin, Nedved blindonte kualifikimin në 3-0, por ndëshkohej me të verdhë dhe humbte finalen. Për Realin, ish- i Zidan shënonte golin e 3-1, por që nuk shërbeu. (Bilanci total, 2-2)
Sezoni 2004-2005 - Dy vite më vonë, sërish Juve-Real, në 1/8-at. Madrilenët fitojnë vajtjen 1-0 në shtëpi (Helguera gol), ndërsa në Torino, Juventusi dërgon takimin në shtesë (Trezege vendosi kohën e rregullt) dhe Zalajeta në të 116-ën i dhuron kualifikimin. (Bilanci total, 3-2 për Juven)
Sezoni 2008- 2009 - Këtë herë, shorti i vë përballë në fazën e grupeve, ku në Torino fiton Juventus 2-1 (Del Piero e Amauri për bardhezinjtë, Van Nistelroi për madrilenët golat), por edhe në kthim, Del Piero me një dopietë personale thyen Realin dhe fiton duartrokitjet e "Bernabeut". Rezultati i 180 minutave vlerëson Juven. (Bilanci total, 4-2 për Juven).
Sezoni 2013-2014 - Sërish faza e grupeve, sërish JuveReal, por këtë herë bilanci i dopio duelit fitohet nga madrilenët. Spanjollët fituan 2-1 në shtëpi dhe barazuan 22 në Torino. Rezultati i 180 minutave vlerësoi Realin. (Bilanci total, 4-3 për Juven)
Sezoni 2014-2015 - Dopio përplasja e fundit është ajo e tri sezoneve më parë. Në gjysmëfinale, Juventusi fitonte vajtjen në Torino, 2-1, me Moratën dhe Tevezin që zhvlerësonin golin e Ronaldos. Në kthim, në "Bernabeu", Reali i cili kryesonte 1- 0 deri në minutën 67, (penallti e Ronaldos në të 23-ën), pa ish-in Morata që të tundte rrjetën për Juven, një gol që u lejonte italianëve kualifikimin dhe sigurimin e finales, që do ta humbnin ndaj Barçës. Rezultati i dopio sfidës vlerësoi "Zonjën". (Bilanci total 5-3 për Juven)