Luftëtari rigjen yjet dhe “sulmon” zonën europiane
Bluzinjtë e Likës vazhdojnë të shpërdorojnë raste pa fund
Luftëtari rikthehet te fitorja në shtëpi dhe konsolidon pozitat për një vend në Kupat e Europës. Ndaj Lushnjës nuk ka qenë një shëtitje, madje gjirokastritët, edhe pse kanë dominuar takimin, kanë rrezikuar të lënë pikë. Kristal Abazaj dhe Dejvi Bregu kanë bërë diferencën, në një takim që përpara ndeshjes cilësohej si i lehtë për Luftëtarin. Gjirokastritët vazhdojnë të shpërdorojnë në masë raste për shënim, duke filluar nga Bregu, Lamçja, Abazaj, por jo vetëm. Megjithatë, klasi i lojtarit të Kombëtares vendosi ndeshjen e djeshme, teksa me një goditje shumë të bukur nga jashtë zone zhbllokoi rezultatin. Ndërsa më pas duheshin pritur minutat shtesë që të çlirohej nga makthi i golit edhe vlonjati Bregu. Ngërçi psikologjik që kishte kapur lojtarin u shpërblye në minutën e 94-t. Për skuadrën e Hasan Likës ishin tri pikë shumë të rëndësishme në luftën për një vend në Europë. Tashmë aleat i Luftëtarit është edhe kalendari, pasi do të luajë dy ndeshjet e tjera radhazi në shtëpi kundër Teutës dhe Laçit.
PJESA E PARË Luftëtari e nis në sulm, ndërsa Lushnja në debutimin e Ilir Gjylës mundohet të mbrohet mirë dhe të mos lërë hapësira për gjirokastritët. Mirëpo, cilësia e lojtarëve bluzinj bën që të krijohen raste të pastra për gol shumë shpejt, madje njëra pas tjetrës. Pas tentativave të Liçajt dhe Lamçjes, është Bregu që detyron Spahon të grushtojë me vështirësi pas një goditjeje dënimi. Më pas, Abazaj i vetëm me portierin shpërdoron, duke e nxjerr topin jashtë. Goli duket sikur pritet të vijë nga momenti në moment, por Lamçja nuk u beson syve, kur pas një kundërsulmi, shërbehet nga Abazaj dhe bën më të vështirën brenda zonës. Gjithsesi, loja e Luftëtarit shpërblehet pak minuta pas përfundimit të pjesës së parë, kur Abazaj me një goditje spektakolare nga vendi, i ndodhur jashtë zonës, e dërgon topin në rrjetë. Skuadra bluzi shkon më e qetë në pushim, falë avantazhit të një goli.
PJESA E DYTË
Pas pushimit është Lushnja që ndryshon dhe aktivizon Alushin dhe Papën.
Miqtë, duke mos pasur çfarë të humbin, guxojnë për të rrezikuar, ndërsa gjirokastritët lënë goxha hapësira dhe duket sikur e marrin lehtë. Lushnja nis të qarkullojë topin dhe të afrohet gradualisht në zonën gjirokastrite, por nuk arrin të shfrytëzojë
shtatlartësinë e Sefës dhe Pepës, që markohen mirë nga Jakovljeviç dhe Rapa. Hasan Likën nuk e mban vendi në pankinë, pasi kupton se diçka nuk shkon. Lamçja del i dëmtuar dhe në fushë është Shkurtaj, që rikthehet pas katër javësh nga dëmtimi. Më
pas del edhe Rroca për Rrapon. Loja bëhet monotone, me ndërprerje të shpeshta prej dëmtimeve, derisa në kohën shtesë është Bregu që vulos fitoren dhe rikthehet te goli pas tre muajsh. Tashmë Luftëtari mendon për sfidën me Teutën.