Hejnkes snobon Borusian: Sevija, shumë më e fortë

Bavarezët luajnë të martën çerekfinalen e parë

Jup Hejnkes arriti të thyejë rekordin e Luis Van Gal dhe Karlo Ançelotit me fitoren në ndeshjen e fundit në Champions ndaj Beshiktashit. Gjermani regjistroi fitoren e 11-të radhazi me bavarezët. Pa dyshim një shifër e frikshme kjo, duke parë rivalët që la pas. Seria e fitoreve nisi më datë 2 prill 2013 ndaj Juventusit në shtëpi, deri në ndeshjen e fundit ndaj Beshiktashit më datë 14 mars 2018. Hejnkes synon të fitojë sërish tripletën me Bajernin, ashtu siç bëri në sezonin 2012- 2013, ku mundi në finale Dortmundin me rezultatin 2-1, falë golit në minutat e fundit të Arjen Robenit. Ndeshja e radhës është ndaj Sevijës për çerekfinalen e Champions-it. Por trajneri, edhe pse mendon që ndeshja është e vështirë, lojtarët do të sillen si profesionistë dhe do të zhvillojnë lojën e tyre. "Në pjesën e parë ishte një shfaqje gala e skuadrës, por në pjesën e dytë e ulëm pak ritmin, pasi të martën kemi një ndeshje të rëndësishme në Champions ndaj Sevijës. Nuk besoj se lojtarët e mi do të vetëkënaqen nga rezultati ndaj Dortmundit. Në ndeshjen e së martës na pret një kundërshtar i vështirë. Ndeshja ndaj Sevijës është e një kalibri të ndryshëm nga ai i kampionatit", u shpreh Hjenkes pas rezultatit tenistik ndaj rivalëve të Dortmundit në ndeshjen e së shtunës. Ndërkohë, edhe drejtori sportiv Hasan Salihamixhiç foli për ndeshjen ndaj spanjollëve. "Tani vjen Sevija, kampionati është pothuajse i yni. Na erdhi keq që nuk ndodhi kësaj jave në praninë e tifozëve tanë. Por do të synojmë ta fitojmë në javën e ardhshme ndaj Augsburgut. Jemi të fokusuar për ndeshjen e radhës, ku do të synojmë kualifikim ndaj një kundërshtari të vështirë". Më pas, ai foli edhe për Hames Rodrigez. Kolumbiani shënoi një gol

dhe dha dy assist për skuadrën duke u rikthyer në kohët e arta, si te Kolumbia në Botërorin e vitit 2014. Hasan është i mendimit se Hames është lojtar kyç për skuadrën. "Ai di të bëjë që gjërat e vështira të duken të lehta. Kam dëgjuar që po zhvillon një kurs intensiv për të mësuar gjermanishten. Kjo është një këshillë që ia kam dhënë më përpara", përfundoi drejtori sportiv i bavarezëve.