"Na penalizuan mungesat, më kënaqte barazimi"
Trajneri i Kamzës, Ramadan Ndreu, për "Gol pas Goli" u shprehe se ndaj Partizanit ishte një ndeshje e vështirë dhe do ishte i kënaqur edhe me një barazim. "E kam thënë dhe herë të tjera, është një kampionat i vështirë. Po bënim ndeshje të mira dhe nuk po na vinin rezultate. Do isha i kënaqur që ndeshja të dilte edhe barazim. Partizani ka lojtarë me kualitet në gjirin e vet. Morëm një humbje që na kushton, por me rëndësi është që prodhojmë lojë. Patëm 2 mungesa. Linja e djathtë na mungoi, si Idrizi dhe Frashëri. U munduam të fusim Fukiun mbrojtës të djathtë. Një pozicion mundesh ta riparosh, por në derbi na mungoi e gjithë linja e djathtë. Rastet e kundërshtarit nga ajo pjesë erdhën. Mungoi pasimi i fundit? E vërtetë, edhe në pushimin e pjesës së parë, për këtë gjë i fola ekipit. Duhet të dalim shumë shpejt. Ishim jo të shpejtë në veprime. Aksioni duhet të nisë që te mbrojtësit. Por, edhe dy mesfushorët ishin mbrapa dhe me shpinë nga porta e kundërshtarit. Kjo gjë na penalizoi", u shpreh trajneri Ndreu.
MBIJETESA- Sa i përket sigurimit të mbijetesës së Kamzës, trajneri Ndreu u shpreh: "Është një kampionat me rivalitet. Pavarësisht pikëve, nuk mund të flemë gjumë. E dija që kampionati do shtrëngohej. Ka ekipe jashtë objektivit që të japin maksimumin. Lufta tani është e hapur, por kam besim te skuadra edhe me kthimin e 2 lojtarëve që na mungojnë, do të vijmë te lojërat që kemi zhvilluar deri tani. Është e rëndësishme të mos humbim besimin".