Pogradeci fiton në fund, bie Apolonia
Liqenorët triumfojnë dhe parakalojnë miqtë nga Fieri
ogradeci thyen Apoloninë. Një gol në fund u ka mjaftuar liqenorëve që të marrin këtë trepikësh që i ngjit një shkallë më lart në renditje. Me shpresat për Superioren që janë shuar, ndeshja e luajtur dje në "Gjorgji Kyçyku" shërbeu vetëm për prestigj. Edhe në këto kushte futbolli i bukur nuk mungoi, megjithatë rastet e rrezikshme ishin minimale. Vetëm dëshira e të rinjve nuk mjaftoi dhe sidomos kur vendësve u mungonte "bomberi" Çekiçi në fushë, ndërsa miqtë nuk aktivizuan 5 titullarë.
PJESA E PARË
Loja nisi shpejt dhe me qarkullim të dendur në mesfushë, por kur vinte puna për finalizim mungonte agresiviteti. E megjithatë, fierakët shfaqen disi më të rrezikshëm dhe për këtë mendon Lamaj. Lojtari kontrollon mirë topin dhe i ndodhur i vetëm përballë portierit Malit, nuk finalizon. Kundërpërgjigjen vendësit me anë të Kames, por as sulmuesi pogradecar nuk arrin të mposht Hasfatijan. Më pas janë minuta të qeta me disa ngacmime sporadike, që më së shumti vinin nga distancë e largët, por pa "trembur" portierët. Pjesa e parë mbyllet me një rast të bardhejeshilëve, por Mihana tregohet pak egoist, duke menduar të zgjidhë gjithçka vetëm, në një kohë që mund të shërbente te të tjerët dhe çonte ekipin në dhomat e zhveshjes në avantazh.
PJESA E DYTË
Pjesa e dytë ka thjesht dëshirë për lojë dhe aspak mundësi për të krijuar episode. Kronika është shumë e varfër. Me vështirësi, të dyja ekipet u drejtohen portave
respektive, e ndonëse të dy trajnerët kryen zëvendësime në këtë repart, kjo nuk solli diçka ndryshe. Diferenca bëhet nga pogradecarët vetëm në minutën e 88- të. Pas një goditjeje këndore, topi ngelet në zonë dhe atje mendon mbrojtësi Pere që ta
shtyjë në drejtim të rrjetës dhe zhbllokojë shifrat. Edhe pse pas këtij moment kishte edhe dy minuta kohë të rregullt dhe katër minuta shtesë, fierakët nuk gjetën dot forcën për të reaguar me atë ekip aq të ri që kishin zbritur në fushë. Kështu, pogradecarët
marrin tri pikë të plota në këtë fazë dhe kjo shihet si një sinjal i mirë për vazhdimësinë, edhe pse hapur e kanë shprehur që kanë si objektiv vendin e tretë. Pas pushimit që u ofron kalendari, kanë edhe 4 ndeshje për të realizuar misionin.