Liga e Kampioneve, Ali shuan ëndrrat e Çelsit
Venger buzëqesh me Auban, Stok kapitullon në 15' e fundit
Pas 20 javësh të Pre mier Ligës, Kejn nuk ishte titullar, por diferenca në "Stamford Bridge" nuk u ndie aspak. Totenhemi fiton me përmbysje ndaj Çelsit të Kontes 3-1 dhe ruan hapin e Liverpulit në garën për Champions-in e sezonit të ardhshëm. Kampionët tani janë -8 pikë nga djemtë e Poçetinos dhe duket se trenin e fundit që të dërgon në elitën e Europës, e kanë humbur përfundimisht. Ai që zëvendësoi uraganin, në stol pas fazës së riaftësimit në kaviljen e djathtë, ishte Dele Ali, autor i një dopiete fantastike në pjesën e dytë, e cila shoi ëndrrën e Kontes dhe ndërpreu serinë e 25 ndeshjeve pa fitore në "Stamford Bridge" (prej vitit 1990). Blutë kaluan në avantazh pas gjysmë ore lojë falë krosimit milimetrik të Mosesit për Moratën, i cili duke përfituar nga dalja e gabuar e Loris, devijon lehtësisht me kokë drejt rrjetës. Por kur dukej se pjesa e parë do të mbyllej me avantazhin e vendësve, një trajektore magjike nga jashtë zone e snajperit Eriksen shtang Kabajeron. Gol manuali ai i minutës së 62-të: Daier vertikalizon për Alin, i cili kontrollon në mënyrë perfekte në zonë dhe me një prekje të shpejtë dhe të ëmbël djeg kohën e Kabajeros në dalje. Pas 4 minutash, talenti anglez shënon sërish pas një rrëmuje në zonën e Çelsit dhe me bashkëpunimin e Son.
Arsenali - Në javën e 32-të të Premier Ligës, Arsenali mund 3-0 Stok Sitin, duke arritur fitoren e dytë radhazi në kampionat. Një sukses që rezultati e bën të gënjeshtërt, pasi ishte i vuajtur. Sepse "topçinjtë" do të zhbllokoheshin vetëm 15 minuta përpara fundit, pavarësisht dominimit absolut, falë një penalltie të dyshimtë të akorduar nga arbitri Pouson për një faull të Martins Indit ndaj Ozilit, e transformuar në gol nga Obamejang. Katër minuta nga fundi, është sërish sul-
muesi gabonez ai që dyfishon, me një të djathtë fluturimthi, pak përpara se edhe Lakazet, gjithnjë me penallti, të mbyllë llogaritë. "Poçarët" mbeten në vendin e parafundit të klasifikimit me 27 pikë, ndërsa londinezët mbeten në vend të 6-të (51 pikë) dhe larg zonës Champions. Venger mund të kënaqet vetëm me formën e skuadrës së tij në prag të ndeshjes së vajtjes së çerekfinaleve të Ligës së Europës, kundër CSKA-së së Moskës.