Besëlidhja në ajër, lojtarët bëjnë presion për largim
Besëlidhja të shtunën në shtëpi nuk ia doli që të rezistonte përballë Erzenit duke kapitulluar që në fund të pjesës së parë me shifrën minimale 0-1. Një humbje që nuk ndikon në fatin e saj të këtij fundsezoni, por që zhgënjeu tifozërinë. Lezhjanët e Besëlidhjes, falë një goli të shënuar nga mbrojtësi i majtë Edison Ndreca në javën e fundit të fazës së dytë ndaj Dinamos, ia dolën që të riktheheshin në 5-shen e parë të minigrupit "PlayOff", kësisoj duke siguruar mbijetesën në Kategorinë e Parë. NDRECA - Mbrojtësi i majtë i Besëlidhjes, Edison Ndreca, gjatë një bisede për "Panorama Sport" shprehet: "Besëlidhja e këtij sezoni është shumë më e dobët se ajo e vitit të shkuar nga të gjitha pikëpamjet. Kjo tashmë është e qartë në rezultatet tona të deritanishme. Edhe sezoni i kaluar ka qenë me të njëjtat rregulla si tani, ndaj krahasimin e bëj në të njëjta pozita. Sezonin e shkuar në kampionat ne ia dolëm që, nga një diferencë e theksuar me kreun në fund të fazës së dytë, ta mbyllnim kampionatin me pikë të barabarta me skuadrën që u ngjit në Superiore. Krahas kampionatit, sezonin e kaluar patëm sukses të kënaqshëm edhe në kompeticionin e Kupës dhe ia dolëm që të avanconim deri në gjysmëfinale, duke lënë pas Partizanin dhe Flamurtarin. Duke e krahasuar sezonin në vijim me të kaluarin, ka ndryshime të mëdha, por përfshirja jonë në minigrupin e "Play-Off"-it na barazon me sezonin e kaluar. Pjesa e mbetur e sezonit për ne është vetëm për statistikë. Tashmë, gjithçka ka marrë fund për sezonin në vijim, por që tani duhet menduar seriozisht për sezonin e ri, që kjo skuadër të mund t'i rikthehet elitës. Unë ndonëse kam pasur shumë oferta për sezonin në vijim, madje edhe në merkaton e janarit vendosa që ta respektoj kontratën deri në fund, ndërsa për sezonin e ri do t'i studioj mirë ofertat dhe do të vendos", përfundoi Ndreca. Preng Gjikola