Kaos për Malotën, zbardhen prapaskenat
Në kampin shkodran shpresuan për një rikthim të shpejtë
Mbrojtësi i Vl laznisë, Renato Malota, u përfshi dy javë më parë në një skandal falsifikimi dokumentesh në zonën e plazhit "Rana e hedhun" në Shëngjin dhe që nga ajo kohë është shpallur në kërkim nga Policia e Lezhës. Futbollisti, në deklaratën e dhënë në momentin që policia ka dalë në komunikatë për mediat, ka deklaruar se është i pastër dhe nuk ka lidhje aspak me çështjen në fjalë. Por, që nga ajo kohë, ai nuk është bërë pjesë e skuadrës dhe trajneri Gjoka e ka pasur shumë të vështirë zëvendësimin e tij në formacion. Ndërkohë, dje ka qarkulluar lajmi se futbollisti ishte dorëzuar në Policinë e Lezhës për të sqaruar pozicionin e tij për akuzat që i janë bërë. Një gjë e tillë qetësoi për disa orë drejtuesit e klubit, që shpresuan se lojtari mund të rikthehej sa më shpejt në ekip, duke qenë një garanci për mbrojtjen në fazën e fundit të kampionatit, ku edhe shkodranët garojnë për mbijetesë. Por, një gjë e tillë duket se nuk do të jetë e mundur,
për të paktën për një kohë të pacaktuar, pasi hetimi për Malotën dhe të tjerët që janë përfshirë në këtë skemë tjetërsimi pronash vazhdon, ndërkohë që një pjesë e madhe e të akuzuarve po ndiqen në gjendje të lirë. Malota ka ndërtuar një lokal në zonën
ranore ku ka pasur edhe probleme me pronat, por lojtari ka bërë me dije se gjithçka e ka bërë me lejen përkatëse të bashkisë. Ai gjithashtu ka konfirmuar se ka edhe prona të trashëguara në zonën e "Ranës së hedhun", pasi është pikërisht nga ai vend. Por, lojtari ende nuk ka arritur që të pastrojë emrin e tij nga akuzat që i janë bërë.
MOHIMI - Lajmi i dorëzimit të Malotës në Policinë e Lezhës nuk është i vërtetë. "Panorama Sport" është interesuar gjatë ditës së djeshme për të konfirmuar një gjë të tillë pranë Komisariatit të qytetit të Lezhës, por përgjigja ka qenë negative. Burimet kanë konfirmuar se nuk ka pasur asnjë dorëzim të Malotës dhe ai vazhdon të jetë ende në kërkim zyrtarisht. E njëjta përgjigje është marrë edhe nga Policia e Shkodrës, që ka bërë me dije se futbollisti nuk është paraqitur në ambientet e saj dhe me urdhër të prokurorisë vazhdon të jetë në kërkim. Natyrisht, që një lajm i tillë nuk është aspak pozitiv për kuqeblutë, që shpresonin shumë të kishin në përbërje lojtarin.