“Mposhtim Tomorin për prestigj dhe revansh”

Mesfushori Hysenshahaj: Nuk mjaftohemi me kaq, luajmë për vendin e tretë

Ndeshja e radhës i vendos fierakët përballë Tomorit të Beratit. Pritet të jetë një takim më shumë për prestigj, por edhe ambicie për renditje. Apolonia kërkon që të bëjë njëfarë autokritike për humbjen 2-3 që i shkaktoi ky ekip gjatë fazës së parë në shtëpi. Por me beratasit asnjëherë nuk ka qenë e lehtë, kudo ku është luajtur. Aq më tepër këtë herë, kur Tomori vjen me moral të lartë, duke qenë se i ka shkaktuar humbjen e dytë sezonale skuadrës së vendit të dytë, Bylisit (ekip që deri në para kësaj jave, vetëm me Apoloninë pati regjistruar humbje). Ndonëse me shumë gjasa të dyja skuadrat do të aktivizojnë në fushë shumë lojtarë të rinj, takimi mes tyre pritet të jetë i luftuar, i hapur dhe me synim fitoren prej të dyjave. Për fierakët nuk ka alternativë tjetër, përveç tri pikëve dhe këtë e shpreh mesfushori Taulant Hysenshahaj, i cili ishte edhe kapiteni i bardhejeshilëve në ndeshjen e fundit kundër Pogradecit. "Janë javët e fundit, të cilat kanë rëndësi për gjithë sezonin. Ne vërtet e kemi realizuar objektivin tonë minimal, por nuk mjaftohemi me kaq. Vazhdojmë të jemi në garë dhe me synimin që të mos biem poshtë vendit të tretë. Në ekip po aktivizohen lojtarë të rinj, siç ndodhi me Pogradecin, por edhe ata kanë ambicie, grintë dhe dëshirë për të treguar vlerat e tyre dhe për të dalë fitues. Këtë javë luajmë me Tomorin, një ekip i respektueshëm dhe me vlera. Kemi favor se luajmë në fushën tonë, por unë mendoj se na pret një takim shumë i vështirë, prej së cilit mund të presësh çdo lloj rezultati. Gjithse- si, ne do të luajmë me besim të palëkundur dhe do të kërkojmë vetëm fitoren", përfundoi Hysenshahaj. Apolonia e ka "detyrim" fitoren këtë herë, pasi në tri javë të luajtura për fazën e tretë, ka pësuar tri humbje radhazi (0-1 me Bylisin, 1-5 me Tiranën dhe sërish 0-1 me Pogradecin), ndaj kundër Tomorit kërkojnë kthesën për të argëtuar tifozët. Bujar Rama