Skënderbeu ndërron 3 furgonë, mundet nga Tirana

Flamurtari e Goga Basket bënë formalitetin

Ndeshja për javën e parafundit të bas ketbollit të femrave ka qenë mjaft e mundimshme për vajzat korçare, të cilat kanë udhëtuar rreth 7 orë për të mbërritur në Tiranë, një udhëtim i ndarë në tre "stacione". Ndalesa e parë pas nisjes nga Korça ka qenë në Elbasan, pasi fatkeqësisht, furgoni me të cilin udhëtonin i ka lënë në baltë, si rrjedhojë e një defekti. Gjithsesi, askush nuk është dorëzuar, por pasi është lajmëruar ky problem, skuadra ka pritur mjetet e linjës Elbasan - Tiranë, por ndalesa e radhës ka qenë "Qyteti Studenti", sepse furgonat nuk lejohen më që të zbresin në qendër të kryeqytetit. Nga aty, është nevojitur një tjetër mjet për të mbërritur në sallën sportive "Fahrie Hoti". Kjo aventurë fatkeqe gjithsesi konfirmon edhe sakrificën dhe vullnetin e vajzave korçare për të mos humbur ndeshjen në tavolinë, ndonëse në fund, gjithsesi duhej të dorëzoheshin përballë Tiranës, me një humbje të thellë në shifrat 93-44, edhe pse takimi nisi me një orë e 20 minuta vonesë. Një nga vajzat korçare, pikërisht numri 4, Marina Pëllumbi, shpjegoi: "Ishim të dërrmuara dhe pa ngrënë, pasi direkt erdhëm në parket për të zhvilluar ndeshjen. Kemi udhëtuar me tre furgona". Skuadra e Tiranës, e cila është dhe pretendonte për titullin, nuk toleroi, duke i fituar të 4 periodat: 19-5, 24-18, 25-12 dhe 25-9. Më e mira te korçaret ishte Fatjona Harris.

Ndeshja e Vlorës - Fitore e lehtë e Flamurtarit në Vlorë përballë Vllaznisë, duke konsoliduar vendin e parë në renditje. Tashmë, kur ka mbetur vetëm një ndeshje që të mbyllet kampionati i rregullt, do të luajë në transfertën e kryeqytetit përballë Tiranës, por pavarësisht nga kjo, vendi i parë nuk ndryshon. Vajzat vlonjate po mendojnë për Superkupën dhe fazën "play-off", ku i kërkojnë të dy këta tituj. Për sa i përket takimit të djeshëm, Flamurtari e ka dominuar ndeshjen përballë një Vllaznie me vajza të reja, me rezultatin 91-49.

Ndeshja e Durrësit - Tjetër fitore për Goga Basket në shtëpi. Skuadra e trajnerit Miltiadh Driza, këtë herë, mundi 79:46 Studentin. Pavarësisht rezultatit me diferencë pikësh, loja ishte e fortë dhe me ritëm të lartë. Goga në përbërje ka më shumë kualitete, ndaj shkëputet menjëherë në pikë. Studenti nuk dorëzohet dhe përpiqet të bëjë mirë në periodën e dytë. Pas pushimit, vendaset tregohen të pamëshirshme dhe e mbyllin historitë me suksesin.

A.Dushku, K.Brahimaj, R.Gjini