Sot zgjedhjet, Beqiraj: Shtanga në duar të sigurta
Peshëngritje / Presidenti bekon dy kandidatët
Asambleja e Jashtëzakonshme e FSHP- së mbahet 2 muaj pas dorëheqjes së presidentit Elez Gjoza, kur dolën në shesh rezultatet pozitive në testet antidoping të Romela Begajt, në Botërorin e Shteteve të Bashkuara, duke caktuar kështu 5 prillin si ditën kur do të zgjidhet personi i radhës që do të ulet në poltronën e këtij institucioni. Një ditë përpara zgjedhjeve, "Panorama Sport" kontaktoi me presidentin provizor aktual, profesor Gudar Beqiraj, lidhur me procedurat e këtyre zgjedhjeve.
Zoti Beqiraj, si po procedohet për zgjedhjet e reja?
Qëllimi dhe detyra ime e deritanishme ishte përgatitja e terrenit për zgjedhje. Është bërë një punë e përsosur, ku çdo gjë është gati. Siç jeni në dijeni, kandidojnë dy persona të dashur për komunitetin e peshëngritjes dhe që të dy vlerësohen shumë nga unë dhe ambienti i shtangës.
Cilët do të jenë faktorët që do të vendosin fitoren?
Procedurat për zgjedhjet janë të tilla: Do të votojnë gjithsej 21 persona me të drejtë vote. Votimi do të jetë i fshehtë. Do përpiqemi ta bëjmë sa më transparentë momentin e votimit. Sigurisht që nuk do të mungojnë edhe mediat, të cilat do t'i ftojmë ta filmojnë këtë proces. Besoj se gjithçka do të shkojë mbarë e pa asnjë problem, sepse kemi të bëjmë me një komunitet të kulturuar.
Si president aktual, pse nuk vendosët të jeni pjesë e kandidatëve?
Detyra ime ishte deri këtu. Nuk kisha pretendime për të kandiduar, por objektivi kryesor ishte përgatitja e zgjedhjeve të reja.
Çfarë impulsi apo ndryshimi pritet të japë presidenti i ri?
Mendoj se nuk do të ketë ndonjë ndryshim. Por, të dy kandidatët, ashtu sikurse edhe Elez Gjoza, do ta mbështesin peshëngritjen, duke i krijuar kushte më të mira sesa kanë qenë deri tani. Aq më shumë, duke qenë dhe në detyrën e presidentit të federatës, kontributi i tyre do të jetë maksimal.
Kë mund të vlerësoni më të mundshmin nga dy kandidatët?
Të dy kandidatët e duan peshëngritjen dhe kanë kontribuar për të. Për fat të mirë,
janë dy njerëz mjaft të dashur për peshëngritësit. Nuk mund të gjendet asnjë vërejtje për të dyja kandidaturat. Theodhor Masllavica është një figurë që e do shumë peshëngritjen dhe ka kontribuar me financime personale për shumë sportistë, disa prej të cilëve të ekipit kombëtar, edhe pse nuk vjen nga fusha e sportit. Ndërsa Ilir Topuzi është e kundërta. Si ish- peshëngritës e njeh mirë terrenin se ku po shkel dhe jam i bindur që do të jetë gjithashtu një figurë e rëndësishme, nëse zgjidhet. U uroj suksese të dyve.