“Poker” i Barcelonës, por Roma bën dhurata
Dy autogola të italianëve, Pike dhe Suarez vulosin sfidën
Për një pjesë Roma ëndërroi se mund ta luante ndeshjen e dytë çerekfinale me llogari të pambyllura. Por pastaj Barcelona doli në lojën e saj duke shfrytëzuar gabimet e verdhekuqve dhe hipotekoi kalimin në gjysmëfinale. Rezultati 4-1 nuk lë shumë hapësirë për besim në radhët e italianëve, edhe pse kanë detyrimin që të provojnë. Për Romën, mungesë fati (dy autogola) dhe pengu i një penalltie të padhënë në fillim kur ndeshja ishte 0-0. Për Barcelonën, një fitore me pak shkëlqim, pavarësisht se rezultati final është 4-1. Mesi? Provoi të shënonte për të marrë pak nga vëmendja e tepërt e Ronaldos, por nuk ia doli.
DY DHURATA- Dominim total i Barcelonës në 45 minutat e para. Roma ka thjesht krenari dhe dëshirë për të bërë lojë, por vetëm dëshira kundër Barcelonës nuk mjafton. Katalanasit janë "Zotë" të fushës në të gjithë repartet dhe krijojnë raste të shumta për të shënuar. Mesi ka përballë portierin, që ende nuk i ka shënuar dhe provon ta thyejë mallkimin që në minutën e dhjetë. Por Alison e ndal sepse goditja nuk ishte e duhura. Por porta e brazilianit tronditet në minutën e 18-të kur Rakitiç përfiton nga gabimet në mbrojtje dhe e djathta e tij ndalet në shtyllë. Roma mbrohet mirë dhe kërkon të shfrytëzojë shpejtësinë e Florencit dhe Perotit, por dy lojtarët e Romës përplasen me një "mur" kur shkojnë në zonë. Mesi këmbëngul dhe Rakitiç lëshon një tjetër goditje, ndërsa Suarez në të 27tën vë sërish në provë portierin e verdhekuqve. Dhjetë minuta më vonë, Daniele De Rosi u bën dhuratën e parë katalanasve. Edhe ata i pranojnë ato. Pas një aksioni Iniesta-Mesi, mesfushori pason në qendër të zonës dhe kapiteni i Romës e dërgon në rrjetë duke mposhtur portierin e tij. Roma reagon në pjesën e parë, por në momentin që Barcelona jep maksimumin, bën keq dhe fut në panik mbrojtjen e italianëve, aq sa ata e shtyjnë vetë topin në rrjetë. Këtë herë është Manolas nën presion, që nuk mund të bëjë asgjë dhe i çon shifrat në 2- 0. Ky ishte autogoli i pestë në këtë Champions në favor të Barcelonës. Fati ndonjëherë është me më të mirin.
DHE "POKERI"- Porta e Alisonit, në pjesën e dytë, shndërrohet në një tabelë qitjeje, ku të gjithë provojnë shënjestrën. Ai ia del që t'i ndalë në një farë mënyre, por në një moment Pike ka mbërritur në zonë dhe pasi portieri e ndal, mbrojtësi e dërgon në rrjetë, duke shënuar golin e tretë të ndeshjes. Një gol që shuan shpresat e Romës për një rezultat pozitiv në "Kamp Nou". Por ekipi i Di Françeskos nuk e humbet besimin për të shënuar një gol shprese dhe kërkon ta bëjë nga goditjet e këndit. Por duhet të presë deri në minutën e 80-të dhe në fakt e shënon nga një aksion. Mban firmën e Edin Xhekos. Por më parë Ter Shtegen kishte bërë dy mrekulli, njërën ndaj Defrel dhe tjetrën ndaj Perotit. Por goli ishte thjesht një kënaqësi e momentit sepse Luis Suarez mbyll llogaritë në fund, duke shënuar të katërtin për Barcelonën.