Spanjollet një makth, italianet kanë kaluar vetëm 4 herë

Java që po mbyllet rezultoi e hidhur për ekipet italiane në Ligën e Kampioneve. Fillimisht, Juventusi dhe më pas Roma morën shuplakat e radhës nga ekipet spanjolle. Ky bilanc negativ me disfatat e radhës shënon një thellim të krizës për ekipet italiane në Champions, sidomos kur përballë shorti vendos ekipet nga "Primera Liga". Për të dhënë idenë e makthit që po përjetojnë klubet e Serisë A, mjafton të them se në 32 përballjet e fundit ndaj skuadrave iberike, janë regjistruar vetëm katër fitore, teksa humbjet e Romës e Juves e thellojnë edhe më shumë bilancin negativ të pesë sezoneve të fundit.

SHIFRA MAKTHI - Në një llogaritje gjithëpërfshirëse të javës që lamë pas, derbi europian mes Italisë dhe Spanjës përfundoi 1- 7. Nëse golat e pësuar nga Juventusi ishin një shuplakë e trefishtë nga Reali pas leksionit të finales së Kardifit në sezonin e kaluar, disi më e pritshme ishte humbja e Romës kundër Mesit me shokë. Në rastin e verdhekuqve pjesën më të madhe të dëmit, djemtë e Di Françeshkos e shkaktuan vetë duke realizuar dy autogola. Për Romën, goli i Xhekos ndaj Barcelonës, mbetet i vetmi në tre duele me ekipe spanjolle, pasi me Atletikon e Madridit ekipi italian barazoi pa gola në shtëpi dhe u mund 2- 0 në transfertë. Totali për italianët bëhet edhe më i rëndë nëse konsiderojmë që në gjashtë ndeshje janë humbur katër dhe barazuar vetëm dy sfida. SINDROMË IBERIKE - Në pesë vitet e fundit Milani ka humbur dy dhe barazuar vetëm një ndeshje kundër ekipeve spanjolle në sezonin 2013- 14. Napoli me katër ndeshje të luajtura ka humbur tre dhe fituar vetëm një dhe këtë në fazën paraeleminatore kundër Atletikos së Bilbaos. Tri humbje dhe dy barazime ka koleksionuar Roma, ndërsa Juventusi që ka pasur edhe pjesëmarrjen më të rregullt, ka një bilanc prej katër fitoresh, gjashtë barazimesh e po aq humbjesh. Pikërisht, bardhezinjtë janë të vetmit që mbajnë lart nderin italian, duke regjistruar fitore në pesë vitet e fundit gjatë të cilave ekipet e Serisë A kanë përjetuar makthe të vërteta në përballjet me homologët spanjollë.