Partizani, vjen momenti i Arbnor Fejzullahut
Mungon që nga 13 shtatori kur u dëmtua, e nis nga ekipi B
Partizani ka vuajtur shumë dëmtimet e disa lojtarëve kryesorë, por pjesa e fundit e sezonit parashikohet që ta gjejë "top" ekipin. Pas shtatë muajsh vuajtjeje, tani te Partizani po vjen momenti i Arbnor Fejzullahut, i cili i mungon të kuqve që nga transferta e Kupës në Kuçovë, ku më 13 shtator u dëmtua dhe u largua nga fusha në minutën e 17- të. Dëmtimi rezultoi i rëndë, pasi mbrojtësi iu nënshtrua një ndërhyrjeje kirurgjikale në këmbën e djathtë. Rikuperimi i Fejzullahut konsiderohet në hapin final dhe tani pritet që lojtari të zbresë në fushë. Ashtu siç ishte paralajmëruar më herët, rikthimi i mbrojtësit pritet të vijë nga Partizani B, ku do ta provojë veten në kushte loje. Me shumë mundësi, rikthimi i Fejzullahut në lojë do të vijë për ditëlindje, ku nesër mbrojtësi feston 25-vjetorin. Partizani B pret të dielën Kukësin B dhe Fejzullahu mund ta nisë si titullar me skuadrën e trajnerit Genc Mamutajt këtë takim. Në varësi të ecurisë së këtij takimi do të vendoset edhe për të ardhmen e mbrojtësit.
Formacioni- Me shumë mundësi, Arbnor Fjezullahu të dielën do të luajë me Partizanin B, por kjo gjë do të vendoset sot, pasi ekziston edhe një plan B, që lojtari të grumbullohet me ekipin e parë. Për këtë takim trajneri Dalipi ka tri mungesa, Trashi i pezulluar nga kartonët dhe Bardhi me Kalarin kanë probleme fizike. Në mungesë të këtyre lojtarëve, formacioni pritet që të ndryshojë këtë javë, ku Çani dhe Lukas shikohen si titullarë ndaj Laçit. Nëse Fejzullahu grumbullohet me ekipin e parë, shanset që të luajë janë të pakta. Ndaj, duke ditur që mbrojtësit i duhet të provojë veten në kushte loje, me shumë mundësi i bie që ditëlindja ta gjejë në fushë me fanellën e Partizanit B.