Spaho: Po shkojmë në Kategorinë e Parë, por nuk do ta tolerojmë Vllazninë

Portieri veteran bën analizën e dështimit të Lushnjës këtë sezon

Portieri i Lushnjës, Mikel Spaho, është shprehur se Lushnja do të bëjë gjithçka në Shkodër për të marrë rezultatin pozitiv. Portieri "veteran" që këtë verë do të mbushë 36-vjeç tha se Lushnja është një skuadër fatkeqe. Me shumë dëmtime, me paga modeste dhe pa merkato në janar; skuadra preku shpejt fundin. Një ekip që mendon për Kategorinë e Parë, duke dhënë garancinë se do të japë maksimumin për fazën e katërt të kampionatit. Asnjë pikë- "Duke parë që në të gjitha ndeshjet po të shikojmë, Lushnja e ka bërë lojën e saj. Pavarësisht se edhe fati nuk ka ndikuar shumë sepse futbolli është edhe pjesë e fatit. Por, besoj që edhe ne kemi gabuar në disa momente".

Gabimet- "Po t'i bëjmë një kthim prapa të gjithë kohës, të gjithë kanë vënë një 'gur', që Lushnja të jetë në këtë gjendje. Kampionati tani është në përfundim dhe mendoj që po përgatitemi për Kategorinë e Parë".

Gjyla- "Me ardhjen e trajnerit Gjyla, ekipi është në një gjendje më të mirë, më të shëndoshë. Është pak e vështirë ta them unë që trajnerët vendosin shumë në stadiumin 'Roza Haxhiu'. E them këtë duke parë gjendjen që ka ekipi. Edhe një trajner i mirë nuk ka çfarë bën! Sado të motivojë, të motivojë. Problemi mbetet te pjesa e lojtarëve dhe jo te trajneri". Dëmtimet- "Me dëmtimin e Xhafës, Markut, Bufasit dhe së fundi të Marjus Korreshit. Flasim për repartin e mbrojtjes, ku që nga java e pestë filluan problemet e Lushnjës në këtë repart. Që me dëmtimin e Xhafës dhe me radhë të tjerët. Dihet që në një ekip si Lushnja ndiehen mungesat. Lushnja nuk ndërhyri në merkato për të marrë lojtarë mbrojtës ku ishin dhe dëmtimet. Nuk i pati mundësitë. Duke parë dhe gjendjen financiare që kemi ne".

Vllaznia- "Duke parë paraqitjen e ekipit në ndeshjen e kaluar me Luftëtarin. Ishte një ndeshje shumë e luftuar nga ana jonë. Ne mundohemi që të japim më të mirën. E gjithë pjesa e lojtarëve, por tani është një moment dhe periudha më e keqe e ndërrimit të stinëve. Lojtarët e kanë pak me ndryshimin e klimës. Vllaznia është një ekip që të lë të luash futboll ashtu si dhe Luftëtari. Ne do të mundohemi të luajmë sa më mirë dhe rezultati është i fushës". Kundërshtari- "Ne do të luajmë futboll. Duke biseduar edhe me trajnerin Gjyla, toleranca do të jetë "zero". Që nga ndeshja e parë me Vllazninë deri te ndeshja e fundit me Luftëtarin, ne do t'i luajmë të gjitha ndeshjet e fazës së katërt, në mënyrë të drejtë dhe korrekte. Nuk do të ketë asnjë lloj tolerimi. Skuadra është e destinuar t'i përgjigjet trajnerit, të jap maksimumin e vet deri në fund". Alban Alushi