Lika s'ia del, Tirana gjysmake në Ballsh
Luhet pa "bombera" për Superioren, Ze Maria vendos heshtje
Tiranës i shtohen hallet para Bylisit. Ndeshja më vendimtare e sezonit i gjen bardheblutë pa sulm dhe pa portier. Sikur të mos mjaftonte operacioni i Ngoosë apo Sentamu që vazhdon të pushojë në Ugandë, konfirmohet zyrtarisht mungesa e Ilion Likës. Portieri përfundimisht nuk ia ka dalë. Edhe pse është munduar që të riaftësohet në kohë, dhimbjet që e kanë shoqëruar këto ditë e bëjnë të pamundur aktivizimin e tij. Pa 37-vjeçarin, i cili ka dëshmuar se është pika më e fortë e bardhebluve nuk do të jetë e lehtë. Megjithatë, të gjitha shpresat varen te Alesio Abibi, i cili edhe këtë javë do të jetë titullar.
Ndryshimet - Në kushtet kur nuk luan asnjëri prej "bomberave", pritet që Ze Maria të surprizojë. Referuar provave që bëri dje në stërvitjen, që ishte edhe e fundit para ballshiotëve, në majë vendosi 17-vjeçarin Muçi. Krahët kanë dilema, pasi janë parë dy variante. Gjatë javës ka menduar që të hedhë Grecën majtas dhe Halilin djathtas, ndërsa dje ka eksperimentuar, duke përfshirë Bardhin në vendin e Halilit dhe këtë të fundit e ka spostuar në anën tjetër. Pra, duhet parë nëse do i besojë një tjetër të riu në sulm apo përvojës së Grecës në 90 minutat që "vulosin" ndoshta ngjitjen në Superiore. Vetëm mesfusha nuk lëviz, pasi do i besohet përvojës së Dajës, Mavejes dhe Karabecit. E njëjta gjë vlen për krahët e mbrojtjes, ku priten Kërçiku e Hoxhallari, ndërsa qendra do të ketë ndryshime. Në krahë të Cakes mund të luajë Bishaj, por edhe Turtulli. Prej 4 ndeshjesh nuk e aktivizon për asnjë minutë, megjithatë duket se ka ndërmend ta rikthejë pikërisht sot. Në seancat e kësaj jave është parë që e ka provuar edhe si titullar, duke dhënë sinjale "faljeje". Ende nuk është kuptuar se çfarë ka ndodhur mes tyre, paçka se publikisht trajneri ka theksuar dhe ritheksuar se është vetëm vendim teknik. Megjithatë, kur sot në Ballsh
do të luajnë një 90-minutësh përcaktues, ka menduar që të shtojë eksperiencën në prapavijë dhe sidomos kur dihet që kjo ndeshje duhet të mbyllet me "zero" gola të pësuar.
Heshtja - Ze Maria vendos heshtje para Bylisit. Nuk foli vetë, por kërkoi edhe që askush nga lojtarët të mos dilte para mediave. Motivi: pret qetësi në ndeshjen më vendimtare të sezonit. Skuadra përfundoi dje paradite përgatitjet, që gjithashtu u zhvilluan me dyer të mbyllura dhe larg syve kureshtarë dhe në mesditë mori rrugën për në Fier, ku edhe kaluan natën.