Shansi i fundit, Egnatia di si mundet Kastrioti

Rrogozhinasit kërkojnë sërish "kokën" e krutanëve

Pas fitores me Dinamon, që tashmë është arkivuar, në kampin rrogozhinas vëmendja është rikthyer te sfida me kryesuesit e Kastriotit. Kudo në klub po punojnë që gjithçka të jetë në lartësinë e duhur sa i përket anës organizative. Egnatia i ka shkaktuar humbjen e parë Kastriotit në këtë kampionat, duke e mundur 1-0 në fushën e vet në fazën e dytë. Kurse lojtarët janë duke zbatuar me përpikëri programin e detajuar stërvitor nën drejtimin e stafit të trajnerëve. Gjithashtu, edhe tifozët e shumtë vendës po mendojnë që të krijojnë një ambient sa më elektrizues në shkallët e stadiumit "Hasan Zyla". Për mesfushorin Andi Selimaj, dueli me krutanët ka rëndësinë e tij. Kujtojmë që krutanët janë të shkëputur me tetë pikë nga Egnatia. Kjo është mundësia e fundit që rrogozhinasit të shpresojnë deri në fund për vendin e parë, vetëm nëse fitojnë ndaj Kastriotit. Për "Panorama Sport", mesfushori Selimaj shprehet: "Sfida me Dinamon është harruar nga ana jonë. Të shtunën do kemi përballë Kastriotin kryesues, që ne i kemi shkaktuar humbjen e parë këtë sezon. I kemi vlerësuar maksimalisht gjatë seancave, si dhe përbërjen që kanë e ecurinë e deritanishme. Vijmë pas dy rezultateve pozitive, kjo edhe falë formës së mirë që po kalojmë. Do të luajmë përpara tifozëve tanë, që janë një motiv më shumë dhe nuk na lejohen hapa fals. Kam bindjen se do t'ia dalim të fitojmë me një lojë të bukur e duke qenë të saktë në çdo drejtim. Duhet ta dinë të gjithë se tek Egnatia 'çelësi' drejt suksesit është fryma e grupit", tha Selimaj. Aldo Buzi