Në Madrid çmenden për Salah, Perez gati të ofrojë 160 mln €

Egjiptiani përfundon në orbitën e “Los Blancos”

Në sajë të golave dhe paraqitjeve fantastike, Mohamed Salah po tërheq Liverpulin, si në Premier Ligë po ashtu edhe në Ligën e Kampionëve. Sulmuesi egjiptian ka qenë vendimtar edhe në sfidën e së mërkurës në Europë kundër Mançester Sitit të Guardiolës (gol dhe dy asiste në fitoren 3-0 të skuadrës së Jyrgen Klop-it), duke u konfirmuar si nga lojtarët më në formë të sezonit. "Marshimi" i tij është mbresëlënës dhe, përtej pengjeve të krijuara te tifozët e Romës, ka joshur skuadrat më të mëdha të Europës. Në Spanjë është përfolur për një sfidë të mundshme mes tri "të mëdhave": Atletiko Madrid, Barcelona e Real. Por, duke gjykuar nga zërat e fundit të përcjellë nga "Don Balon", gara për ish- lojtarin e romanëve ka një fitues: sipas portalit iberik, në fakt, menaxheri i lojtarit ka gjetur një akord total me Florentino Perezin. Shifra? Përflitet për 160 milionë euro. Përpara avancimit të një oferte zyrtare te të kuqtë, numri një i "Los Blancos" dëshiron të presë propozimet për Karim Benzema e Garet Bejl, dy lojtarë që tashmë prej kohësh po qëndrojnë gati për t'u larguar nga kryeqyteti spanjoll.

KENJ E "LEVA" - "Galaktikët", ndërkaq, po ndjekin edhe sulmuesin e Totenhemit, Herri Kejn, i monitoruar edhe në merkaton e verës. Dy yjet e Premier Ligës, egjiptiani dhe anglezi, janë aktualisht në vend të parë dhe të dytë, respektivisht në kampionatin anglez. Një tjetër "i mbikëqyrur" është Robert Levandovski që, sipas burimeve pranë madrilenëve, qëndron madje në krye të dëshirave të Perez- it për vendin e qendërsulmuesit.