Teuta pa Shkallën, Hrkaç: Ia dalim ndaj shkodranëve
Begeja bën gati Bilalin për qendrën e mbrojtjes
Pas barazimit me Luftëtarin në Gjirokastër, që pati shijen e fitores, stafi teknik i Teutës ka lënë dy ditë pushim futbollistët dhe të martën do të nisin përgatitjet për ndeshjen me Vllazninë. Kundër kuqebluve, Gentian Begeja nuk do të ketë në dispozicion qendërmbrojtësin Silvestër Shkalla, i cili në ndeshjet e fundit ka qenë i pakalueshëm në mbrojtje së bashku me Ante Hrkaç. Shkalla mori kartonin e katër të verdhë kundër Luftëtarit dhe do të qëndrojë një ndeshje pushim, në vend të tij pritet të luajë Amir Bilali, i cili u bashkua me bregdetarët në merkaton e janarit. Ndeshja me Vllazninë ka një rëndësi të jashtëzakonshme për objektivin mbijetesë, pasi përballë është një kundërshtar direkt. "Është një ndeshje shumë e rëndësishme për ne, pasi përballë kemi rivalin direkt për mbijetesë. Një fitore kundër tyre do të kishte një vlerë të madhe për objektivin tonë, pasi do të barazoheshim me pikë me Vllazninë dhe do të ngjiteshim në vend të tetë në klasifikim. Po kalojmë një moment mjaft të mirë dhe duhet ta shfrytëzojmë", u shpreh mbrojtësi Ante Hrkaç në prononcimin e dhënë për "Panorama Sport". Objektivi - I pyetur nëse kjo ndeshje do të jetë vendimtare për fatin e dy skuadrave, Hrkaç u shpreh: "Është edhe një fazë për t'u zhvilluar, pra ka dhe shumë ndeshje në lojë dhe nuk mendon se kjo do të jetë decizive. Gjithsesi, për ne do të jetë si një finale, pasi e duam me patjetër këtë fitore dhe nëse e arrijmë gjithçka do të jetë më e lehtë për objektivin tonë". Në fund 26-vjeçari foli edhe për repartin e mbrojtjes, që në javët e fundit ka treguar stabilitet, teksa nuk kanë pësuar gol në dy ndeshje radhazi. "Realisht i gjithë ekipi ka bërë një performancë të mirë në lojërat e fundit. Në mbrojtje nuk kemi lënë hapësira dhe kjo falë impenjimit të të gjithë ekipit, por edhe vetëbesimit që kemi fituar. Besoj se tani nuk do të ndalemi më dhe që nga java e ardhshme do të ndryshojmë pozitat në klasifikim, por për ta bërë këtë kërkojmë edhe mbështetjen e tifozëve, pasi ata janë shumë të rëndësishëm për ne", mbylli kroati. Drilon Xhepollari