Në Argjentinë surprizon Kratçlou, tension Rosi-Markez
Moto GP/ Garë e çmendur brenda e jashtë piste
Çmimi i Madh i Argjentinës ishte një çmenduri e vërtetë. Në fillim ai që bëri kapriço ishte qielli, i cili duke rrezikuar kohën me shi dhe pistën e lagur, e shtyp startin e garës për disa minuta, pak përpara startit Mark Markezit i fiket motori dhe e ndez atë mes të tjerëve që prisnin semaforin jeshil, ndërsa sërish spanjolli e mbyll duke acaruar në maksimum Valentino Rosin dhe e nxjerr nga pista atë. Me pak fjalë, një fundjavë më kaotike sesa kjo në Argjentinë, ishte e vështirë që të gjejë në Moto GP. Gara ka startuar me frike, pasi asfalti kishte shumë pjesë të lagura, por gjithsesi, Milner, Kratçlou, Zarko e Rins ditën që t'i japin ritëm garës, edhe pse në xhirot finale ishin këta tre të fundit që parakalonin njëritjetrin dhe mbajtën gjallë emocionet, derisa në fund, britaniku Kal Kratçlou arriti që të fitojë dhe të festojë në një garë më shumë sesa e çmendur. "XIXA" ROSI- MARKEZ - Gjithsesi, më shumë sesa ajo që dhuroi kreu, ishin në prapavija emocionet më të mëdha. Piloti i Hondës, Mark Markez, i cili si rrjedhojë e ndezjes së motorit në vijën e startit, mori pas nisjes një penalizim prej 5-sekondësh duke zbritur shumë shkallë në renditje. Por tentativat e tij agresive për të rikuperuar sa më shumë pozicione, bënë që në xhiron e 20-të, spanjolli të hynte i vendosur në kthesë, por duke mos frenuar siç duhet, i shkon Valentino Rosit trup më trup, duke e detyruar italianin e Jamahës që të përfundojë në barë dhe të rrezohet. Ky e tërboi shumë "Doktorin", i cili u kthye i irrituar në bokse, edhe pse e ngriti motorin dhe e mbylli garën. Në fund, Markez e kuptoi gabimin e tij dhe shkoi në boksin e Rosit, por nervozizmi i Valentinos ishte shumë i madh, ashtu sikurse ai i menaxherit dhe njëkohësisht shokut të ngushtë të italianit, të cilët nuk pranuan faljet e spanjollit, madje e shtynë atë jashtë bokseve me nervozizëm. Me pak fjalë, edhe në Moto GP parashikohet një luftë e ashpër tani e në vazhdim mes Rosit dhe Markezit.