Gjyla: Humbja na është bërë institucion
Lushnja ka pësuar një tjetër humbje në kampionat, e cila ishte e 10-ta rresht dhe një gjë e tillë ka shqetësuar jo pak trajnerin Ilir Gjyla. "Ajo çfarë më shqetëson më shumë është që humbja është bërë institucion. Duhet që futbollistët të mbajnë më shumë peshën e humbjes. Ashtu siç janë trajneri, stafi dhe të gjithë ata që kërkojnë nga Lushnja, ashtu duhet të jenë edhe futbollistët. Të mbajnë përgjegjësi për humbjen ose ta ndiejnë më saktë. Sepse në momentin që nuk e ndien humbjen nuk je i gatshëm për ndeshjen tjetër. Nuk mundet që të humbësh, duke kaluar javë pas jave në humbje. Edhe të kalojë pa problem fare, pa e ndierë peshën e humbjes. Nuk mund të vazhdojë kështu. Thashë dhe një herë; humbja është bërë institucion. Kjo është e frikshme. Janë mësuar të gjithë me humbjen dhe nuk ka problem që humbëm. Nuk jam dakord me këtë", është shprehur trajneri Gjyla. Tekniku i lushnjarëve ka shprehur edhe një tjetër shqetësim. "Është e vërtetë që të gjithë duan të luajnë në formacion. Kjo për trajnerin është diçka e mirë, kur futbollisti kërkon të luajë. Por, ama, e kundërta nuk duhet të ndodh! Pse nuk luan në formacion dhe kur të hyjë në pjesën e dytë apo dhe nëse nuk hyn fare; ndeshjen tjetër të jetë "pse nuk më futi një ndeshje". Fundja fare morali i një futbollisti dhe stadi janë pikët. Në momentin që nuk ke pikët, nuk ke moral të kërkosh llogari. Është shumë e thjeshtë. Nuk ke pikët, nuk ke moral të kërkosh llogari. As unë si trajner, as futbollistët", ka mbyllur trajneri që ka pak javë në krye të ekipit. Alban Alushi