Milani del blof me Sasuolon
Politano hesht "San Siro"-n, aliniç dhuron një pikë dhe rigjen golin pas 5 muajsh
Milani ka harruar të fitojë. Është ky konstatimi që vjen natyrshëm pas sfidës së djeshme. Kuqezinjtë nuk arrijnë të përfitojnë nga ndalesat e Interit dhe Romës dhe në shtëpi ndaj Sasuolos nuk shkojnë përtej një barazimi. Është Politano që u jep avantazhin miqve me Milanin që pas shumë stërmundimesh arrin të barazojë me Kaliniçin. Pikërisht, kroati është e vetmja anë pozitive e mbrëmjes, pasi sulmuesi më në fund gjen golin pas pothuajse pesë muajve agjërim.
OFENSIVË - Gatuzo hedh në fushë formacionin e zakonshëm, ku i vetmi ndryshim është prania e Abates në vend të të dëmtuarit Kalabria, ndërsa në sulm përsëri besim Kutrones. Miqtë nuk kanë ardhur në "San Siro" për të bërë "të sakrifikuarit" dhe luftojnë në çdo top. "Djalli" e di që nuk ka energji të mjaftueshme për 90 minuta dhe e nis me vrull me shpresën për të zhbllokuar sa më herët takimin. Rastet nuk mungojnë me Konsiljin, që nis mbrëmjen e tij prej fenomeni me një supërpritje ndaj Kesit. Emocionet kthehen në ankth kur në minutën e gjashtë Romanjoli del i dëmtuar duke i lënë vend Muzakios. Milani vazhdon sulmet dhe me radhë. Çalhanoglu, Suso e përsëri Kesi mundohen të shembin murin zigjelbër që vetëm Konsilji e mban në këmbë. I vetmi reagim nga miqtë vjen me Politanon që përpiqet të ndëshkojë Milanin, por sulmuesi gabon shënjestër. Pjesa e parë mbyllet me dy minuta shtesë që nuk shërbejnë për të konkretizuar dominimin kuqezi.
SUPER- Konsilji - Edhe në fraksionin e dytë lajtmoviti është i njëjtë, me Milanin që krijon volum loje dhe djemtë e Iakinit që presin momentin e volitshëm për të goditur. Mungesa e konkretizimeve të sakta shtyn Gatuzon të kërkojë golin duke hedhur në fushë Andre Silvën në vend të Abates dhe Milani kalon në një format më ofensiv (3-3-4). Sasusolo jep sinjalin e parë me Lirolën, por pavarësisht një superpritje të Donarumës, sulmuesi mik është në pozicion jashtë loje. Shtatë minuta më pas me Politanon që ndëshkon të zotët e shtëpisë. Tronditja është e madhe, teksa reagimi kuqezi është i dëshpëruar. Kaliniç, Suso, Çalhanoglu tentojnë golin, por vetëm kroati arrin ta shënojë duke lëvizur në zonë si në kohët e arta dhe duke mposhtur më në fund Konsiljin në minutën e 86-të.
PA LAVDI - Me katër minuta të mbetura dhe gjashtë të tjera shtesë, Milani tenton përmbysjen e madhe, por forcat shterojnë dhe ekipi kapet pas krosimeve të gjata në zonë që spastrohen mes vështirësisë nga prapavija e Sasuolos. Kaliniç tenton përsëri, por goditja e tij është e dobët dhe kontrollohet nga portieri mik, i cili edhe pas disa sekondave nga fundi zgjatet duke bërë mrekullinë e fundit të mbrëmjes. Arbitri Paireto vërshëllen fundin e takimit, ndërsa kuqezinjve duhet të mendojnë për ndeshjen e radhës (me Napolin), me Champions-in që merr pamjen e një vegimi. Vendi i katër mbetet tetë pikë larg dhe pa Bonuçin (i skualifikuar) dhe Romanjolin e dëmtuar, gjithçka komplikohet ndjeshëm.