Dënimi për trukime, Franca ndalon bastet “online” për Skënderbeun
Vendimi vjen nga një kompani shtetërore që monitoron bastet
Dënimi që Skënderbeu mori nga UEFA ka lënë një shenjë jo të vogël në imazhin e futbollit shqiptar në Europë. Lajmi më i fundit vjen nga Franca, teksa të hënën kur Skënderbeu arriti një fitore të bujshme në Vlorë ndaj Flamurtarit, si për ironi, është marrë një vendim nga një kompani e shtetit transalpin që monitoron fluksin e basteve sportive. Kësisoj, nga dje është ndaluar me një vendim zyrtar kuotimi i ndeshjeve të futbollit shqiptar nga kompanitë e basteve "online". Autoriteti shtetëror "ARJEL" ka lëshuar këtë urdhër për të gjithë kompanitë e basteve "online" që operojnë
në Francë. Në dokumentin e publikuar nga mediat franceze shkruhet: "Ndalohen bastet sportive që u përkasin ndeshjeve të kampionatit shqiptar të nivelit të parë (Kategoria Superiore), në të cilat merr pjesë ekipi KF Skënderbeu. Kjo masë aplikohet deri në fund të
kampionatit dhe hyn menjëherë në fuqi". Dokumenti është publikuar me urdhër të presidentit të "ARJEL", Sharl Kopolani. Por kush është "ARJEL"? Bëhet fjalë për një kompani shtetërore, e cila monitoron fluksin e basteve dhe raporton vazhdimisht për kuotat. Ajo shërben si rregullator i basteve sportive në shtetin francez. Mirëpo, një vendim si për Skënderbeun, "ARJEL" e ka marrë në vitet e fundit edhe me klube të tjera. Kjo agjenci shtetërore ka autoritet të plotë mbi të gjithë territorin francez dhe që bën të jashtëligjshëm këdo që del kundër këtij vendimi. Kësisoj, deri në mbyllje të sezonit futbollistik, Skënderbeu nuk do të kuotohet në Francë, duke paralajmëruar kompanitë e basteve në vendin transalpin se mungon totalisht besueshmëria për futbollin shqiptar. Sigurisht, ky vendim vjen i ndikuar edhe nga dënimi që klubi mori nga UEFA.