Beqja: S'na intereson arbitri, gati të mposhtim shkodranët
Mesfushori i Teutës, Fabjan Beqja, në intervistën e dhënë për "Panorama Sport" thotë se çdo rezultat tjetër, përveç fitores, do të ishte dështim për durrsakët, teksa kërkon mbështetjen e tifozëve për ta thyer Vllazninë. "Është një ndeshje shumë e rëndësishme për vetë pozicionin që kemi në klasifikim. Po e studiojmë me detaje kundërshtarin me synimin për të marrë maksimumin. Kjo ndeshje vlen 6 pikë për ne, pasi dihet që përballë kemi një kundërshtar direkt. E respektojmë Vllazninë, por futemi në fushë me qëllimin e vetëm për të fituar", tha fillimisht durrsaku, i cili iu përgjigj më tej pyetjeve. Në gjysmën e dytë të kampionatit keni ndryshuar pozicionin në fushë nga mbrojtës krahu në mesfushor. Ku ndiheni më mirë? Për një lojtar, mbi gjithçka, është të jetë në fushë dhe të japë kontributin e tij për arritjen e objektivave. Të them të drejtën, ky është një rol që e kam bërë edhe kur kam qenë me të rinjtë dhe ndihem mirë. Më pëlqen dhe jam i kënaqur. Sa vendimtare është ndeshja me Vllazninë për mbijetesën? Ne e shohim si një finale këtë takim, por të jem i sinqertë, deri në fund të kampionatit, çdo ndeshje e kemi të tillë, pasi duhet të sigurojmë sa më parë mbijetesën. Faza e katërt sapo ka filluar dhe nuk mund të themi që ky takim do të jetë vendimtar, por sigurisht një fitore kundër tyre do të ishte një hap i madh drejt mbijetesës. A ka presion në ekip, duke pasur parasysh faktin që skuadra rrezikon shumë dhe për më tepër edhe tifozët e kanë braktisur?