Kashami përmend skuthat, Kule merr drejtimin e skuadrës

Me anë të një statusi në "Facebook", trajneri Ndriçim Kashami lajmëroi largimin nga Apolonia. "Dua të falënderoj pa masë të gjithë bashkëpunëtorët e mi të këtij sezoni 'të çmendur që bëmë', për mirëkuptimin absolut që patëm me gjithë strukturat. Falënderoj heronjtë që së bashku kemi sakrifikuar ndoshta edhe kokat tona për lojën e ndershme. Jam shumë i lumtur që jam simbol i tyre. Profesionin tonë pretendojnë se e kuptojnë shumë, por pak janë ata që dinë ta bëjnë dhe për këtë duhet të jesh i lindur. Trajneri duhet të jetë profesionist, i ndershëm, duhet të sillet si lider dhe si i fundit, duhet të jetë si prind i dhembshur, por edhe i rreptë kur duhet, i qetë por edhe karizmatik, mik shok, por edhe autoritet. Shumë çuditen nga mënyra e thjeshtë që unë punoj dhe mendojnë se këtë gjë mund ta bëjnë dhe ata, por ndryshimi është se ata nuk janë unë dhe se ka dashur Zoti që unë të kem cilësitë që thashë më lart. Shumë vetë mbarojnë shkollën për letërsi, por pak nga ata bëhen shkrimtar sepse të bëhesh shkrimtar, do frymëzim dhe të fitosh betejat, duhet vendosmëri. Ky është sekreti i suksesit tim, që skuthat nuk kanë shanse ta kenë ndonjëherë. Faleminderit Zot, faleminderit Apolonia, faleminderit djema. Më vjen mirë që 'burrat' ekzistojnë. Suksese të mëtejshme Apolonisë, pavarësisht se nga ky moment unë nuk do ta drejtoj më i larguar me dëshirën dhe me bindjen time", mbyllet statusi i Kashamit. Ndërsa, skuadra do drejtohet në vazhdim nga zëvendësi Mariglen Kule.