3 gola për 4 minuta, eliminim dramatik i Strakoshës
Atletiko mundet por kalon, Marseja leksion Lajpcigut, ndërsa Arsenali barazoi në Moskë
Penalltia që pësoi në fund Juventusi mund të jetë tepër e dhimbshme, por me sa duket ka edhe më keq, sepse "vetëvrasja" e Lacios ishte e denjë për një film horror. Skuadra e Simone Inzagit, pas një pjese të parë të menaxhuar me kujdes, pas fitores 4-2 në duelin e vajtjes, jo vetëm që e nis me gol (Imobile në të 55-ën) dhe duket sikur hipotekon kualifikimin, por me një rezultat të përgjithshëm 5-2 përmbysja duket e pamundur. Gjithsesi, Në Austri ndodh një tjetër mrekulli për tifozët e Sazburgut, pasi teksa barazojnë shifrat në 1-1 (Debur me të majtën në hyrje të zonës), vetëm një minutë pas golit të Imobiles, ata bëjnë një çmenduri mes minutave 72 dhe 76. Shqiptari Thomas Strakosha sheh fantazma, tradhtohet totalisht nga shokët e tij të skuadrës dhe duhet të nxjerrë topin nga rrjeta edhe tri herë të tjera. Në të 72-ën, një peshë të madhe të fajit e ka edhe portieri i Lacios, pasi Haidara edhe pse lihet i lirë i realizon nga më shumë se 30 metra me një të djathtë potente. Në të 74-ën, Çan shfrytëzon një top karambolesk dhe më pas të devijuar në zonë, ndërsa në të 76- ën, Lacio dhe Strakosha kapitullojnë kur Lainer me kokë i dhuron Salzburgut një ndër mbrëmjet më të paharrueshme në stadiumin e tyre, një përmbysje madhështore, e cila e dërgon në gjysmëfinalet e Ligës së Europës. SPORTING L.-ATL.MADRID
Sfida në Portugali niste nga suksesi 2-0 i Atletikos në shtëpi, në çerekfinalen e vajtjes, por edhe pse gjatë 90-minutëshit të djeshëm zotërojnë topin, strategjia e tyre me shumë pasime horizontale nuk i shkakton aspak dhimbje formacionit të Diego Pablo Simeones. Por ndërsa është kundërshtari që nuk tremb, është Oblak që vendos t'i japë zjarr sfidës në Lisbonë, teksa në minutën e 28të nuk arrin të grushtojë dhe të largojë siç duhet një krosim të Bruno Fernandesit dhe te sfera vjen Montero që e dërgon saktësisht
në rrjetë me kokë. Sportingu ringjallet dhe beson, por Kosta dhe Grizman mendojnë që të luajnë më shumë me bërryla me mbrojtjen rivale se sa të dënojnë atë. Në pjesën e dytë, Atletiko hedh në fushë edhe Torresin e Korrean, por në fund ata mjaftojnë vetëm për të
zotëruar dhe mbrojnë avantazhin e ndeshjes së parë për t'u kualifikuar në gjysmëfinale. CSKA MOSKA-ARSENAL
Anglezët e kishin hipotekuar që në ndeshjen e parë kualifikimin, duke fituar 4-1 në Londër, prandaj ndeshja e kthimit pritej që të ishte një
mësymje totale e rusëve, edhe pse në fund, ata dhe Arsenali arrijnë të dhurojnë sërish shumë gola, por barazimi 2-2 i vlen vetëm futbollit. Gjithsesi, makthet që ofroi Champions-i në dy netët e kaluara i ndjeu edhe Arsenali, pasi ndërsa Çalov në minutën e 39- të i dhuroi avantazhin rusëve, në minutën e pestë të pjesës së dytë, Nababkin bën 2-0. CSKAja nis të besojë, madje i afrohet edhe golit të tretë që mund ta kualifikonte, por Venger merr masat, rreshton një mbrojtje me pesë lojtarë dhe në të 76-ën zgjidh ndeshjen. Uelbek dhe Elneni mbyllin saktësisht kundërsulmin perfekt, ndërsa Ramsej konfirmohet makthi i moskovitëve
duke gjetur edhe barazimin 2-2, i cili mbyll ndeshjen dhe kualifikimin e anglezëve. MARSEJË- LAJPCIG
Gjermanët me fitoren 1-0 në shtëpi, në sfidën e parë, besonin të thyenin fortesën e Marsejës, madje edhe starti i tyre bëri të ëndërrojnë tifozët e Lajpcigut, duke qenë se gjetën avantazhin pas vetëm dy minutash, me Bruma, por reagimi i të zotëve të shtëpisë është i pamëshirshëm. Madje, Marseja përmbys dhe shënon tri herë brenda pjesës së parë. Nëse Ilsanker devijon në portën e Lajpcigut për barazimin 1-1 në minutën e gjashtë, kalojnë vetëm tri xhiro kronometri dhe në "Velodrom" mund të shpërthejë festa,
edhe pse 2-1 i firmosur nga Sarr nuk mjafton për të kaluar. Gjithsesi, euforia transalpine do të kurorëzohet në të 38-ën, kur Tauvin bën 3-1 dhe tashmë gjysmëfinalet duken qartësisht në horizont. Por edhe pjesa e dytë, është një makth për Marsejën, sepse ajo nis me gol për Lajpcigun, kur Augustin në të 55-ën dërgojnë shifrat në 3-2 dhe me këtë rezultat kualifikoheshin gjermanët. Por skuadra e Rudi Garsias ka ende "plumba" në karikatorin e tyre dhe në të 60-ën është Paje që dërgon shifrat në 4-2, përpara se në sekondat e fundit (94') Sakai të blindojë kualifikimin për në raundin e ardhshëm të Ligës së Europës.