Erzeni drejt historisë, në luftë për titullin

Volej meshkuj / Nuk ka një pallat sporti

Erzeni i Shijakut, në volejbollin e meshkujve, gjatë këtij kampionati, ka bërë një paraqitje dinjitoze dhe tashmë ndodhet në fazën e "play off"-it, ku ka fituar takimin e parë 3-0 me Studentin. Sot, ai zhvillon ndeshjen e dytë të kthimit, për të luftuar për një vend në finalen e titullit kampion. Pa dyshim, kjo është një meritë e grupit të volejbollistëve të Erzenit, që kërkojnë t'i kthejnë qytetit të Shijakut lavdinë e shumë viteve më parë, kur ishin kampionët e Shqipërisë, madje duke i përfaqësuar dhe në Kampionatin Europian. Dhe në këtë aspekt, përveç volejbollistëve, një meritë të veçantë ka dhe tekniku i Erzenit, ish-volejbollisti i shquar i Kombëtares dhe i Dinamos, Arben Sako. Në prag të ndeshjes së sotme të kthimit me Studentin, tekniku tiranas Arben Sako, për "Panorama Sport", shprehet: "Kam kënaqësi të veçantë që drejtoj Erzenin në volejboll për meshkuj, të këtij qyteti të vogël, por të madh në volejbollin shqiptar për meshkuj. Këtë skuadër e kam drejtuar dhe shume vite më parë, kur Erzeni nuk ishte në kushte të nivelit që duhej, ndërsa sot kjo skuadër është ngjitur në një kohë rekord në majat e volejbollit shqiptar për meshkuj, duke arritur në fazën e "play off"-it. Natyrisht, këtu kanë një meritë të veçantë drejtuesit e kësaj skuadre dhe veçanërisht kryebashkiaku Ardian Kokomani, i cili me insistimin e tij dhe dëshirën e jashtëzakonshme, ka arritur që skuadrës t'i plotësohen të gjitha nevojat, duke bërë që të jetë një

ekip i një niveli të lartë kombëtar. Meqenëse në Shijak mungon infrastruktura përkatëse dhe është nevoja për një pallat sporti të lojërave me dorë, kjo gjë është kompensuar mjaft mirë nga pasioni për volejbollin. Një dashamirësi të madhe për këtë sport dhe për ekipin e Erzenit ka treguar Perikli Goga, djali i basketbollistit të mirënjohur Dhimitraq Goga, emrin e të cilit mban sot pallati i lojërave me dorë në Fllakë, në periferi të Shijakut. Ai, si pronar i këtij pallati sportiv, ka vënë në dispozicion të Erzenit ambientet sportive pa asnjë përfitim financiar, për zhvillimin e stërvitjeve të kësaj skuadre dhe të ndeshjeve gjatë gjithë kampionatit. Duke u ndalur te sfida e sotme e ndeshjes së kthimit me Studentin në Tiranë, trajneri i mirënjohur Arben Sako shton: Kemi ardhur deri në këtë fazë të këtij kampionati nëpërmjet stërvitjeve intensive të grupit të talentuar, që ka në gjirin e vet Erzeni,

përkujdesjes së jashtëzakonshme të stafit drejtues, që na kanë krijuar kushtet për të arritur deri në këtë pike. Kemi fituar takimin e parë në fushën tonë 3-0 me Studentin, por kjo nuk mjafton sepse çdo gjë varet nga ndeshja e sotme, për të cilën mendoj se futbollistët e mi janë mjaft të përkushtuar dhe kam besim të plotë se edhe sot do te dinë të bëjnë më të mirën për të arritur në finale. Në këtë drejtim e gjej me shumë vend të vlerësoj përkrahjen e jashtëzakonshme të tifozërisë së zjarrtë shijakase, që ndonëse skuadra e tyre nuk i ka akoma kushtet për t'u ndeshur në Shijak, ata gjithmonë kanë qenë në numër më të madh, në raport me tifozët e ekipeve të tjera. Besoj se e njëjta gjë, madje më e fuqishme, do të jetë prezenca e tyre në takimin e sotëm vendimtar me Studentin", përfundon tekniku i shquar i Erzenit, Arben Sako. Fiqiri Shehu