Feston Skënderbeu, KAS i pret shpresat Partizanit
FSHF dështon, ish-sekretari Eduard Prodani e paralajmëroi. Miliona dhe frikë nga UEFA në Lozanë, ja prapaskenat me gjyqet e korçarëve
Në Korçë mund të qëndrojnë të qetë, titulli i sezonit 2015- 2016 është i Skënderbeut. Gjykata e Arbitrazhit Sportiv (KAS) në Lozanë anuloi dje vendimin e Komisionit të Etikës në FSHF, dhënë më 23 qershor 2017, nga ku klubit korçar i ishte hequr titulli. Apeli i përpiluar nga Skënderbeu që më 4 gusht 2017 është cilësuar i drejtë nga KAS-i i Lozanës, duke konfirmuar në këtë mënyrë dështimin e FSHF-së në një çështje të pabazuar në rregulloret e veta për të imponuar sanksionet në nivel kombëtar. "Kostoja e gjykimit do të paguhet nga FSHF. Të gjithë mocionet në vazhdim ose apelimet nuk pranohen", citohej ndër të tjera dje në vendimin e zbardhur nga KAS-i i Lozanës. Kjo e fundit ka sqaruar se nuk i është dashur të merrte në shqyrtim provat, pasi FSHF-ja nuk kishte asnjë bazë ligjore për të marrë këtë masë. Çudia më e madhe e vendimit të Etikës ishte se penalizoi me pikë Skënderbeun për një sezon që nuk akuzohej dhe nga ana tjetër, i hoqi titullin kur nuk thuhet në asnjë pikë të rregullores për të dhënë një vendim të tillë. Kjo "vepër" që e çoi FSHF-në në humbjen e një gjyqi me klubin e Skënderbeut u gatua nga pesë anëtarë të Komisionit të Etikës. Bëhet fjalë për kryetarin Fatmir Brraka, zv.kryetarin Bejkush Birçe, si dhe anëtarët Ardian Leka, Bashkim Koka dhe Agron Kuliçaj. FSHF-ja u përfaqësua në KAS- in e Lozanës nga shefi i zyrës juridike, Aldi Topçiu, si dhe avokati italian, Antonio Rigoci, të cilët me mbrojtjen që bënë, nuk ia dolën të bindin panelin e Gjykatës së Arbitrazhit. HISTORIA E GJYQEVE Më 1 qershor 2016, Komisioni i Apelit në UEFA mori një vendim, në të cilin Skënderbeu u shpall i papërshtatshëm për të luajtur në edicionin 2016-2017 të Ligës së Kampioneve, pasi u zbuluan se më shumë se 50 ndeshje të këtij klubi ishin manipuluar për qëllime bastesh. Më 26 korrik 2016, KAS hodhi poshtë apelimin e bërë nga Skënderbeu dhe konfirmoi
vendimin e marrë nga Komisioni i Apelit në UEFA, duke lënë jashtë Ligës së Kampioneve klubin korçar. Në vijimësi të procedurës UEFA-KAS, Komisioni i Etikës në FSHF filloi një procedim në rang kombëtar. Më 23 qershor 2017, Komisioni i Etikës në FSHF dha vendimin, që u apelua,
duke arritur në konkluzionin së Skënderbeu kishte thyer Kodin e Etikës të FSHF-së dhe Kodin e Disiplinës Sportive, teksa i hoqi klubit titullin kampion të sezonit 2015-2016. Gjithashtu e sanksionoi me një gjobë prej 2 milionë lekësh (të reja) dhe i hoqi 12 pikë nga klasifikimi i sezonit 2016-
2017. Mirëpo, më 4 gusht 2017, Skënderbeu apeloi në KAS, duke kërkuar anulimin e këtij vendimi.
VENDIMI I ARGUMENTUAR
Faqja zyrtare e KAS-it jepte dje edhe argumentin e vendimit për çështjen mes Skënderbeut dhe FSHF- së.
"Paneli i KAS që mori në shqyrtim këtë çështje, mbajti një mbledhje në prani të palëve më 22 janar 2018. Pasi mori në konsideratë të gjithë argumentimet e ngritura nga palët, paneli arriti në konkluzionin se sanksionet që iu vendosën klubit nga Komisioni i Etikës i FSHF-së duhet të anulohen, pasi FSHF-së i mungonte baza e mirëfilltë ligjore për të vendosur sanksione në lidhje me faktet në shqyrtim. Megjithatë, paneli i KAS thekson njëkohësisht se vendimi aktual nuk ishte i bazuar në mungesë besueshmërie të provave mbi rastet e manipulimit të ndeshjeve.
Aq më pak, ky vendim mund të kualifikohet si një largim nga jurisprudenca e vendosur nga panelet e mëparshme të KAS. Në të kundërt, paneli i KAS arriti në konkluzionin se raportet e dhënë nga sistemi BFDS i UEFA-s ishin një mjet i vlefshëm në identifikimin dhe sanksionin e mëtejshëm të shkeljeve për manipulime ndeshjesh. Megjithatë, në çështjen në fjalë, paneli as nuk iu nevojit të ekzaminonte raportet e BFDS në detaj, në mungesë të një baze të mirëfilltë ligjore nga rregulloret e vetë FSHF-së për të imponuar sanksionet në nivel kombëtar".