Skënderbeu pa mëshirë, Kamza ndihet e... vjedhur
Ahmataj debuton me humbje, pretendohet për një penallti
T' i shënosh dy herë Skënderbeut në Korçë nuk është e lehtë dhe të dalësh pa pikë nga një ndeshje të tillë është e vështirë për t'u pranuar dhe kjo është ana pozitive e debutimit të trajnerit Ahmataj në krye të stolit. Megjithatë, Kamza u dorëzua përballë të besuarve të trajnerit Daja, që patën oshilacionet e tyre gjatë 90 minutave, megjithatë me eksperiencë arritën të siguronin një trepikësh të artë, duke hedhur një tjetër të sigurt drejt titullit kampion. Nga ana tjetër, Kamza duhet të bëjë llogaritë mirë në ndeshjet në vijim, pasi zona e ftohtë e rënies nga kategoria e kërcënon si asnjëherë më parë.
PJESA E PARË - Vendësit e nisin ndeshjen qetë dhe mundohen të luajnë me shumë pasime në mesfushë, por gjejnë një kundërshtar të vendosur mirë, madje që edhe mundohet t'i rrezikojë me kundërsulme të shpejta. Plaku do të mundohet brenda zonës korçare me një gjuajtje në minutën e 10-të, por nuk është i saktë. Por, fati ndihmon gjithmonë më të mirin. Minuta e 16-të dhe Muzaka kroson pa shumë pretendime në zonën kundërshtare nga një goditje këndi. Por, sfera e ndihmuar edhe nga era e fortë, merr një trajektore të rrezikshme dhe portieri Avdyli që nuk është në pozicion, nuk bën dot asgjë për të ndalur një top që ka kaluar vijën fatale. Disavantazhi u pret shpresave kamzalinjve dhe Skënderbeu hidhet në sulm për të shënuar edhe golin e qetësisë. Xhejms arrin të kontrollojë një top në zonën e Kamzës dhe është shumë pranë vijës fundore, kur preket në shpatull nga Zguro. Aksioni ndodh para syve të kryesorit dhe ky i fundit akordon 11metërsh. Soue në minutën e 28-të nuk gabon nga pika e bardhë dhe dyfishon. Bardhekuqtë e konsiderojnë të fituar takimin dhe lëshojnë në lojën e tyre dhe lënë shumë hapësira, që shfrytëzohen nga miqtë. Zguro në minutën e 35-të përfiton nga një gabim në mesfushë dhe jep një asist për Rezin përballë portierit vendës gjuan saktë dhe shënon. Daja nxehet në stol, por skuadra e tij dukshëm nuk arrin të motivohet. Dhe në minutën e fundit të kohës së rregullt, Zguro ekzekuton një goditje dënimi në hyrje të zonës dhe e ndal sferën në rrjetë edhe pse Teqja mundohet
të grushtojë. Kjo bën që dy ekipet të shkojnë në dhomat e zhveshjes në shifrat 2-2.
PJESA E DYTË - Korçarët nuk mund të pajtohen me barazimin dhe hidhen me të gjitha forcat në sulm dhe u duhen vetëm tre minuta për të kaluar sërish në avantazh.
Minuta e 48-të dhe Muzaka kroson nga këndi, por lojtarët e Kamzës largojnë rrezikun. Topi shkon te Mici, i cili e kthen sërish në zonën mike dhe Osmani me kokë shërben për Xhejmsin, që po me kokë e ndal topin në rrjetë. Kaq mjafton dhe në minutat e
mbetura të takimit Skënderbeu menaxhon rezultatin, ndërsa Kamza e goditur psikologjikisht nuk ka forcën e duhur për të goditur vendësit edhe pse në minutën e 86-të pretendon për një 11- metërsh, pas një prekje të topit me dorë nga Aliti brenda zonës.