Tripletë e Egnatias, Mile mund Erzenin
Sulmuesi shënon dopietë, vendësit të 2-ët
Egnatia mund Erzenin dhe rikthehet në vendin e dytë të Grupit A. Pas humbjes me Kastriotin një javë më parë, në sfidën e djeshme të besuarit e Gjonajt siguruan një fitore bindëse në stadiumin "Hasan Zyla". Duhet theksuar se mungonin për arsye dëmtimi mesfushorët Vu Jiangatao, Melani dhe Dosti, ndërsa sulmuesi nigerian Osinaki kishte plotësuar në katër numrin e kartonëve të verdhë. Megjithatë, stafi kishte aktivizuar formacionin më të mirë që rezultoi efikas në fund. Sulmuesi Vangjel Mile ishte heroi i vendësve, duke shënuar dopietë. Një sfidë e bukur për vendin e dytë u luajt dje në Rrogozhinë mes Egnatias dhe Erzenit. Ndonëse të parët që krijuan rastet më të mira për shënim ishin miqtë, të cilët rrezikuan nëpërmjet R. Troplinit, Goxhajt e Dekavellit, por që nuk mundën të finalizonin, Egnatia më pas reagoi shpejt. Vendësit kalojnë në avantazh në minutën e 16-të me anë të Miles. Sulmuesi
vuri në veprim finesën e mjeshtërinë e tij nëpërmjet një topi që e ka kaluar me zgjuarsi përmbi kokën e portierit Bytyçi. Pas disa minutash është sërish Mile që realizon tjetër gol thuajse "fotokopje" e të parit. Kjo mënyrë loje krejt logjikshëm solli edhe golin e tretë nëpërmjet qendërmbrojtësit Rudin Nako që u shfaq si një "goleador race", teksa kryen një zgjatje këmbe perfekte afër vijës fatale dhe 3-0. Edhe në pjesën e dytë, janë vendësit që shfaqen më mirë dhe krijojnë raste. Afër finishit të krejt lojës, Erzeni shënon golin e nderit me Xhixhiuan. Aldo Buzi