Dramë në Shkodër, Luftëtari trondit stolin e Gjokës
Trajneri kuqeblu mediton largimin, zbardhen prapaskenat me klubin
Luftëtari trondit Vl lazninë në "Loro Boriçi", duke i dhënë një goditje të fortë në garën për mbijetesë. Gjirokastritët kanë arritur një fitore të madhe në Shkodër, teksa e shohin veten në vendin e tretë dhe më pranë se kurrë zonës europiane. Kur pritej që kuqeblutë të bënin kthesën pas asaj humbjeje ndaj rivalit direkt në Durrës, ndodhi e kundërta dje ndaj Luftëtarit. Bluzinjtë treguan se kanë një skuadër me kualitete, që di si të fitojë edhe kur bën një pjesë të parë zhgënjyese. Vllaznia "mallkoi" traversën e Gilman Likës në fillimin e ndeshjes, për t'iu dorëzuar më pas klasit të Kristal Abazajt dhe Dejvi Bregut. Skuadra e Hasan Likës meritoi plotësisht fitoren, madje mund të kishte shënuar edhe më shumë se dy gola në portën e Alen Sherrit. Tashmë gjithçka ndërlikohet për shkodranët, që u duhet të fitojnë patjetër javën e ardhshme, teksa luajnë sërish në shtëpi ndaj Laçit.
PJESA E PARË Skuadrat e nisën me formacionet e tyre më të mira. Starti është i ekuilibruar, edhe pse shkodranët duken më kërkues. Forma e mirë e fantazistit Vucaj nuk mjafton, pasi bluzinjtë me Aleksin dhe Ramadanin bllokojnë mesfushën dhe kuqeblutë e kanë shumë të vështirë të shkojnë në zonën mike. Gjithsesi, Lika jep iluzionin e golit me një goditje nga distanca, ndërsa edhe Sukaj rrezikon me një goditje nga afër portës. Vllaznia kishte marrë masa për të mbuluar rreptë Abazajn, por as shkelmat nuk e ndalën talentin e Luftëtarit. Mersini ia arriti qëllimit që ta markonte mirë në pjesën e parë, por vetëm kaq. Ky fraksion u mbyll me një rast të pastër për gjirokastritët, ndërsa Lika u detyrua të bëj zëvendësimin e parë, pasi Vasil Shkurtaj doli i dëmtuar dhe në fushë në minutën e 45-të u fut sulmuesi Eri Lamçja. PJESA E DYTË
Pas pushimit janë gjirokastritët më të freskët fizikisht dhe Lika orienton dyshen Abazaj-Bregu që të ndryshojnë krahët. Goli i parë i miqve nuk vonon, teksa është meritë personale e Abazajt, që pasi i lë "targën" Mersinit brenda zonës, kap në befasi edhe portierin Sherri, i cili i vendosur jo mirë, pëson një gol nga një kënd shumë i vështirë. Me 0-1 shkodranët thuajse shokohen dhe duhen shumë minuta për të marrë veten. Gjoka freskon skuadrën me Çinarin, ndërsa më pas fut edhe Kalanë e
Tafilin. Mirëpo, asgjë nuk ndryshon dhe rastet mungojnë për shkodranët. Nga ana tjetër, gjirokastritët i afrohen golit të dytë me Rrocën dhe Bregun. Minutat kalojnë shpejt, derisa miqtë "shpikin" një kundërsulm vrasës. Pas kombinimeve të shpejta, është
Bregu që finalizon më së miri aksionin fantastik të bluzinjve. Ky gol duartrokitet gjatë edhe nga tifozët shkodranë, që lënë stadiumin pesë minuta para përfundimit. Përpjekjet e Vllaznisë deri në fund janë të dëshpëruara, ndërsa festa është e gjitha e
Luftëtarit, që merr një fitore të pastër në momentin më kulminant të kampionatit. Skuadra e Likës është e destinuar për Europën, ndërsa në Shkodër rikthehen makthet e mbijetesës. Vllaznia duket se do të vuajë deri në fund.