Kamza, tri pikë shprese
Lushnja ia bën "malore", por Sebino Plaku është në superformë
Kamza ka siguruar një fitore të vështirë në shtëpi përballë Lushnjës edhe pse në letër parashikohej një ndeshje e lehtë për të besuarit e trajnerit Ahmataj. Myzeqarët kishin ardhur në kryeqytet me objektivin e vetëm për të marrë pikë dhe respektuar kampionatin edhe pse tashmë kanë rënë nga kategoria. Megjithatë, Plaku, pesë minuta nga fundi, i dha trepikëshin kamzalinjve, që duke përfituar edhe nga humbja e Vllaznisë, janë larguar me katër pikë nga zona e ftohtë.
Pjesa e parë - Me synimin e vetëm për të marrë trepikëshin në shtëpi, kamzalinjtë kërkojnë të gjejnë golin që në minutat e para të takimit dhe sinjalin e parë në portën lushnjare e jep Idrizaj me një goditje të fortë nga jashtë zonës, por nuk është i saktë. Lushnja është e vendosur mirë në fushë dhe mundohet të thyejë aksionet e kundërshtarit në mesfushë për të dalë më pas në kundërsulme të shpejta. Sefa mbulohet mirë nga vendësit, megjithatë në minutën e 13-të, ai kombinohet bukur me Papën dhe ky i fundit në pozicion ballor me katërkëndëshin e mbrojtur nga Avdyli gjuan një top që kalon ngjitur me shtyllën pingule. Kamza mundohet të organizohet, por mesfusha e ka të vështirë që të lidhet me Plakun që qëndron në vijën e parë të sulmit dhe zgjidhja e vetme janë goditjet nga jashtë zone. Në minutën e 23- të Zguro do të provojë me një të tillë, por Bejte grushton me vështirësi dhe largon rrezikun.
Pjesa e dytë - Kamza nuk mund të pajtohet në asnjë mënyre me barazimin dhe goli vjen sapo starton fraksioni i dytë i takimit. Plaku arrin të hyjë në zonën e Lushnjës dhe lëviz bukur ku lëshon një silurë, të cilën portieri Bejte e ka të pamundur që ta ndalë. Goli i jep vendësve më shumë besim që kërkojnë të mbyllin takimin duke shënuar sërish, por në minutën e 50-të, Fili nuk shfrytëzon siç duhet një krosim të Plakut në zonë, pasi gjuajtja e tij me kokë pritet me këmbë nga portieri kundërshtar. Kamza nuk e ul në asnjë moment ritmin e lojës dhe rastet për shënim pasojnë njëritjetrin, ndërsa Lushnja duket e dorëzuar. Por, kur nuk shënon, ligji i pashkruar i futbollit thotë që e pëson. Lushnja bën një zbritje të mirë në minutën e 76- të me anë të Maganit në krahun e majtë dhe një krosim pa shumë pretendime i këtij të fundit gjen Sefën, që me kokë nuk fal. Barazimi bën që kamzalinjtë
të hidhen me të gjitha forcat në sulm, por me kalimin e minutave presioni rritet. Gjithsesi katër minuta nga fundi, në një goditje nga këndi, Plaku i harruar nga mbrojtësit kundërshtarë me kokë gjuan saktë dhe siguron fitoren e artë për ekipin e tij.