Tripletë e Vllaznisë B, Korabi mbetet në krizë
Vllaznia B ka marrë një fitore shumë të rëndësishme përballë Korabit në ndeshjen e luajtur dje në fushën sportive "Reshit Rusi". Kuqeblutë kanë fituar 3- 1 përballë dibranëve një ndeshje tejet decizive përsa i përket mbijetesës. Me këtë 3- pikësh, skuadra shkodrane ka lënë vendin e fundit. Megjithatë, lufta në Grupin A të "play-out"it do të jetë shumë e fortë deri në fund, pasi diferencat janë të vogla. Një takim ku vendësit e Vllaznisë B kanë dominuar duke shënuar me anë të Ruqit, Pusit dhe Isufit. Nga ana tjetër, dibranëve do u duhet të luftojnë fort për t'i shpëtuar rënies në Kategorinë e Dytë.
NDESHJA - Është mbrojtësi Ruqi ai që shënon i pari. Vllaznia B realizon që në minutën e 9- të duke e nisur mbarë takimin. Miqtë nga Dibra mundohen të reagojnë, por nuk arrijnë të finalizojnë. Pavarësisht rasteve të krijuara, pjesa e parë mbyllet me avantazhin e Vllaznisë B. Në pjesë e dytë, goli vjen shpejt. Është përsëri Vllaznia B ajo që realizon golin e dytë, duke sjellë qetësinë me Pusin. Festa e shkodranëve prishet shpejt, duke rikthyer ankthin sepse për miqtë Lleshi ngushton diferencën në 2- 1
vetëm një minutë pas golit të dytë të Vllaznia B. Shkodranët nuk lëshojnë dhe janë më këmbëngulës. Në minutën e 75- të, ai që vendos fitoren duke sjellë golin e sigurisë është Isufi që realizon me kokë. Ky lojtar edhe në përballjen me Burrelin shënoi golin e fitores,
ndërsa kjo është ndeshja e dytë radhazi që realizon. Miqtë nga Dibra kanë marrë një goditje të fortë, ndërsa duhet të bëjnë edhe pa trajnerin Dorian Bubeqi, i cili është dënuar me një vit pezullim nga Komisioni i Disiplinës. Senad Nikshiqi