Numri i ekipeve në elitë, flasin Hitaj, Hafizi e Prodani
Për "Panorama Sport", në lidhje me ndryshimin e numrit të skuadrave në Kategorinë Superiore kanë deklaruar:
HITO HITAJ
(ish-shefi i sektorit të garave)
"Jam kundër ndryshimit të skemës me dhjetë, madje mendoj se është e rrezikshme çdo tentativë e klubeve për ta shtuar numrin e skuadrave në të ardhmen, me 14 apo më shumë ekipe… Në radhë të parë, unë, si një njohës i mirë i strukturave të futbollit të aplikuara në praktikë, jam i bindur se formati me 10 ekipe është më i miri". ASTRIT HAFIZI
(Ish-trajneri i Kombëtares)
"Sondazhi nxirrte në pah në mënyrë shumë të qartë faktin që edhe vetë klubet e kanë kuptuar tashmë se duhet që të shtohet numri i skuadrave pjesëmarrëse në Superiore. Ka kohë që me këtë garë me 10 ekipe, cilësia ka rënë. U ngjitën në elitë klube, që nuk plotësonin as më minimalen e kushteve. Por, ajo që kam nxjerrë konkluzion gjatë këtyre viteve, është fakti se futbolli u shpërnda në ekipe të vogla, komuna ose provinca. Unë jam për një kampionat me 16 skuadra, ku të futen edhe skuadrat e traditës".
EDUARD PRODANI
(Ish-sekretar i FSHF)
"Klubet kërkojnë thjesht të shtohet numri në Superiore. Jam dakord me profesor Hiton. Skemës me dhjetë mund t'i numërohen shumë të meta, por, sipas meje, kjo është formula më e mirë dhe më e përshtatshme për fazën ku gjendet dhe problemet që kalon futbolli shqiptar sot. Unë jam vërtet i mendimit se mungesa në nivelin elitë të klubeve tradicionale e ka dëmtuar rëndë futbollin tonë. Por është gabim që tani të kërkosh që ta ulësh tërë futbollin në nivelin ku kanë rënë këto klube".