Frashëri: Fitojmë në Korçë
“Kam respekt dhe nuk jam në garë me Koliçin, rëndësi kanë objektivat”
ë katërkëndëshin e skuadrës së Kukësit ka pasur një rrotacion javët e fundit të kampionatit, ku Stivi Frashëri është aktivizuar si titullar. Përpara transfertës ndaj Skënderbeut, korçari i Kukësit konfirmon se do të bëjë maksimumin që skuadra e tij të triumfojë, edhe pse përballë është ekipi i vendlindjes. Në intervistën e tij për "Panorama Sport", Frashëri flet edhe për të ardhmen dhe objektivat me verilindorët.
Stivi, keni arritur të ambientoheni te Kukësi, pasi u bëtë pjesë e ekipit në këtë sezon?
Ambientimi është pjesë e profesionit tonë dhe besoj që, duke qenë në një ekip me profesionistë të vërtetë, gjithçka ka ndodhur më lehtë dhe më natyrshëm.
Prej 6 javësh jeni titullar, keni bërë paraqitje pozitive, si po shkon "gara" me Koliçin?
Kam respekt maksimal për kolegun Koliçi dhe nuk jemi aspak në garë me njeritjetrin, por thjesht ndihmojmë ekipin duke qenë profesionistë. E rëndësishme është të arrihen objektivat e klubit.
Do të qëndroni edhe sezonin e ardhshëm te verilindorët?
Jam akoma nën kontratë me klubin edhe për sezonin tjetër sipas marrëveshjes, por ndihem mirë në këtë klub dhe do jap maksimumin.
Cilat janë ndryshimet që keni konstatuar mes klubeve ku keni luajtur edhe ekipit aktual?
Kukësi është një klub që
ka bërë maksimumin këto vitet e fundit dhe është "top" në aspektin profesional. Por, nuk hedh poshtë aspak edhe klubet e tjera ku kam marrë pjesë dhe jam ndier gjithashtu mirë, si Tirana apo Flamurtari. Objektivat te Kukësi janë për të qenë në krye.
Një korçar kundër Skënderbeut, do t'jua prishni festën bardhekuqve?
Unë vërtet jam korçar, por në radhë të parë jam profesionist dhe mendoj vetëm për klubin në të cilin bëj pjesë. Nuk besoj që ne shkojmë të prishim festën, por do shkojmë për të fituar ndeshjen për llogarinë tonë.
Kujt i druheni më shumë në radhët e Skënderbeut?
Skënderbeu ka lojtarë shumë të mirë dhe jo vetëm Souenë, kështu që nuk bëhet fjalë për droje, por për respekt ndaj kundërshtarëve.
Ju motivon edhe më shumë fakti se mund të luani në Champions pas dënimit të Skënderbeut?
Janë situata që nuk na përkasin ne si profesionistë, t'ua lëmë organeve kompetente këtë çështje. Ne mendojmë për fushën.
Cili është rivali për vendin e dytë në kampionat?
Kemi krijuar një distancë pikësh, por ka edhe disa ndeshje të tjera dhe kundërshtarët që janë poshtë nesh në renditje do bëjnë përpjekje për të na arritur nëse nuk jemi vigjilentë.
Eliminimi nga Kupa e Shqipërisë u përjetua keq te Kukësi, mund të quhet i shpëtuar sezoni me arritjen e vendit të dytë?
Eliminimi nga Kupa e Shqipërisë "djeg" shumë, por kemi gjetur forcat për t'u ringritur dhe duke arritur vendin e dytë, mendoj që jemi brenda objektivave minimalë.