Kriza, Higuain 9 sfida pa gol
“El Pipita”, i karikuar në rrjete sociale: Të luftojmë për ëndrrat tona
ë qendrën stërvitore të "Vinovo"-s kanë rreth gjashtë javë që kërkojnë Gonzalo Higuanin. Argjentinasi nuk është larguar pa lënë gjurmë, por metafora ka lidhje me krizën e golit që ai po përjeton prej disa ndeshjesh. "El Pipita" ka ekzaktësisht nëntë javë që nuk dërgon topin në rrjetë. Për një sulmues, momentet negative gjatë një sezoni mund edhe të shfaqen, por në rastin e 30-vjeçarit kemi të bëjmë me një rast pa precedentë.
BOMBERI- Po të mos luante rregullisht, ky "agjërim" mund të ishte i kuptueshëm, por në fushë Gonzalo zbret dhe madje rregullisht. Asnjë koment negativ për paraqitjet e tij, pasi gjithnjë jep maksimumin siç ndodhi kundër Beneventos që hyri nga stoli dhe fitoi penalltinë që solli fitoren (2-3). Problemi është që sulmuesi nuk sheh më nga portat kundërshtare, pavarësisht fanellës që mban veshur. Në rend kronologjik, Higuain ka "ngecur" ndaj Spalit, Italisë (kombëtare), Spanjës (kombëtare), Milanit, Realit të Madridit ( dy ndeshje), Beneventos, Krotone e së fundmi Napolit.
KURRË MË POSHTË- Në renditjen e golashënuesve të Serisë A, me 15 golat e tij ndodhet shumë larg kryesuesit Çiro Imobile me 29 realizime. Edhe patriotit Ikardi me 26 golat e tij është i paarritshëm, por sfida e nesërme ndaj Interit mund të jetë një rast i mirë për të ngushtuar distancat, por sidomos për t'u zhbllokuar. Numri 9 bardhezi nuk kishte qenë kurrë kaq poshtë në javën e 34-t të kampionati italian. Në dy vitet e para me Napolin shënonte 16 dhe 17 gola ndërsa në vitin e tretë plot 36 herë. Edhe te Juvja nuk ka qenë kurrë nën kuotën e 23 golave në këtë pikë të kampionatit. Me katër javë në dispozicion dhe një titull në valle, Higuain duhet të dalë nga kriza dhe të çojë "Zonjën" në altar teksa në "Instagram" jep kushtrimin: "Të luftojmë për ëndrra tona".