Duka refuzon KAS- in shqiptar për “gjyqin” me Finon, Bezhani: E detyron ligji që ta njohë
"I drejtohemi vetëm KAS-it të Lozanës për drejtësi"
Zbardhet e plotë letra e presidentit të FSHF-së për arbitrazhin shqiptar: “Nuk ju njohin as ndërkombëtarët, i drejtohemi vetëm KAS-it në Lozanë”. Presidenti i KOKSH: “FSHF anëtare e jona, Duka luan me dy porta...”
Rivaliteti mes presi dentit Armand Duka dhe deputetit Bashkim Fino, kandidati rival për kreun e Federatës Shqiptare të Futbollit, tashmë ka kaluar në një garë ligjore nëpër institucione gjykuese, që duhet të shqyrtojnë kërkesa dhe pretendime të palëve mbi rezultatin e Asamblesë Zgjedhore 2018. Së fundmi është publikuar një letër e institucionit të futbollit në vend që mban në fund emrin e presidentit Armand Duka, i cili i drejtohet KAS-it shqiptar. Me një përgjigje, në lidhje me kërkesën e datës 16 prill drejtuar FSHF- së nga KAS-i Shqiptar, FSHF bën me dije se nuk e njeh juridikisht. Ja letra-përgjigje e plotë, drejtuar KAS-it shqiptar nga FSHF:
"Përgjigje një letre të marrë në datën 16.04.2018 nga dikush që prezantohet si Këshilli i Arbitrazhit Sportiv.
Kujtdo që na është drejtuar si KAS,
I/E nderuar zonjë/zotëri që prezantohesh si sekretar i një organizate që sipas jush quhet KAS,
Kemi marrë në adresën tonë letrën e quajtur 'Njoftim të datës 10.04.2018', ku na bëni të ditur se për rrethana apo kondita që janë të panjohura prej nesh, ju na bëni të ditur se, me sa duket, e konsideroni vetën përfaqësues të një organizate që qenka e legjitimuar të zhvillojë një lloj procedure gjykimi në lidhje me disa çështje që lidhen me organizatën tonë. Nëse ka qenë një gabim njerëzor ju lutem na thoni.
Po ashtu na bëni të ditur se këtë nismën po e çoni përpara në sajë të kërkesës së një prej anëtarëve të Kuvendit të Shqipërisë, të nderuarit z. Bashkim Fino, kërkesë për arbitrazh kjo që na keni përcjellë gjithashtu. Në asnjë moment nuk duket të dyshoni në kompetencat tuaja për të vlerësuar këtë çështje dhe na ftoni të zbatojmë njëfarë rregulloreje tuajën, e madje na keni caktuar, Ju i paidentifikuar sekretar, edhe disa afate, të cilat duhet t'i zbatojmë duke na kërkuar të caktojmë edhe një arbitër nga një listë që keni përcjellë ju vetë, ku nuk njohim dhe as mund t'i besojmë asnjë individi.
Në këto kondita, duhet t'ju lajmërojmë se, në radhë të parë, FSHF nuk ka asnjë marrëveshje arbitrazhi me të nderuarin anëtar të Parlamentit, z. Bashkim Fino, dhe nuk e kuptojmë dot si mund të jemi ftuar në arbitrazh prej tij pa e pasur këtë marrëveshje.
Ndërkohë, ju lutem të identifikoni organizatën tuaj me të gjitha të dhënat juridike të nevojshme të saj, vendim gjyqësor apo NUIS, statut e të tjera akte të nevojshme për identifikimin e një personi juridik. Më pas, ju lutem
identifikohuni ju i nderuar Sekretar dhe na sqaroni pak edhe se çfarë është kjo rregullorja dhe çfarë ekspertize kanë këta zotërinjtë që na keni imponuar si arbitra, kush i zgjedh ata, pse s'mund të zgjedhim një tjetër.
Por ndërkohë, nëse ju jeni
pjesë e asaj organizatës që nuk lindi kurrë e që ja ka ndërruar disa herë vetes emrin në KOSH, KOKSH, KOKSHI etj, një organizatë parapolitike e krijuar nga Qeveritë e Republikës së Shqipërisë, ju lutem të ndërprisni çdo veprim të mëtejshëm në lidhje me këtë çështje.
Federata Shqiptare e Futbollit dhe organizatat ndërkombëtare ku ajo aderon nuk kanë njohur dhe deri më sot nuk njohin mundësinë për t'i shtruar çështjet tona ligjore para atij që për herë të fundit në vitin 2010 kërkohej të na imponohej nga Ministri i Sportit si Arbtrazh Sportiv ndërkonfederativ. Është për këtë shkak që në statutin (neni 10) tonë, deri sa një institucion i tillë të pranohet sipas standardeve të UEFA-s dhe FIFA- s, çështja i referohen CAS/TAS Lozanë. Deri më sot nuk kemi marrë nga organizatat ku aderojmë një opinion
të kundërt në lidhje me këtë çështje.
I nderuar i panjohur, sa po ju të vendosni të identifikoheni, ne ndoshta do ta vijojmë komunikimin tonë duke qenë pak më të informuar. Po ashtu do shikojmë edhe mundësinë e hapave ligjore ndaj atyre që na shqetësojnë pa shkak dhe pa tagër në veprimtarinë tonë shumë domethënëse për përparimin e sportit me të dashur në planet. Në pritje të identitetit tuaj, Armand DUKA, President", shkruhet në letrën e FSHF-së në emër të presidentit, Armand Duka.