Çani me probleme në qafë, s’pritet titullar ndaj Teutës
Java stërvitore për Teutën është shoqëruar me probleme dëmtimesh te Partizani. Fillimisht, probleme shfaqën Batha dhe Asani, më pas iu shtua edhe Çani. Batha u rikuperua i pari, pasi i mjaftoi vetëm një ditë pushim, ndërsa Jasir Asani u përgatit i diferencuar vetëm dy ditë. Edgar Çani u ankua fillimisht për një lodhje muskulore dhe u përgatit i diferencuar të martën. Të mërkurën iu bashkua grupit, por dje ai sërish ka qenë larg tij. Mungesa e djeshme e lojtarit u justifikua për një problem në qafë, sëmundje e cila ka prekur më parë edhe Egzon Belicën dhe Alban Hoxhën. Çani dje ka qenë pushim, duke mos u përgatitur me ekipin. Duke ditur programin që ka ndjekur gjatë kësaj jave, ndonëse sot pritet të jetë me grupin, me shumë mundësi ish-sulmuesi i Kombëtares nuk do të jetë titullar në ndeshjen e së shtunës ndaj Teutës. Për këtë takim rikthehet Gerhard Progni, i cili ishte i pezulluar ndaj Lushnjës për efekt kartonësh. FORMACIONI I MUNDSHËM - Trajneri Klevis Dalipi është munduar gjatë kësaj jave që të largojë presionin e rezultateve të javëve të fundit nga ekipi, në mënyrë që ndaj Teutës lojtarët të reflektojnë dhe të kthehen te rezultatet pozitive. Për këtë takim pritet që të ketë ndryshime në formacion, kryesisht në fazën sulmuese, që përkojnë me rikthimin e Prognit dhe me pamundësinë e Edgar Çanit. Me shumë mundësi edhe ndaj Teutës, Trashi sot do të luajë si mbrojtës i majtë. Ndërsa Ibrahimi pritet në të djathtë dhe Belica me Gojkoviç në qendër. Për qendrën e mesfushë, tre lojtarë luftojnë për dy vende, ku një mes Bathës, Telushit dhe Malës pritet ta nisë nga stoli. Gjasat janë që këtë fat ta ketë i riu Mala, gjithsesi, kjo vendoset sot. Faza sulmuese pritet të përbehet nga Abdurrahimi në majë të sulmit, i cili nga prapa do të ketë Prognin në qendër dhe Asanin me Bardhin në krahë. Ky është pak a shumë një formacion i mundshëm, që stafi ka praktikuar gjatë seancave të fundit. Por, referuar së shkuarës, trajneri Dalipi i përzien shpesh kartat gjatë seancave javore dhe formacionin e vendos pikërisht në seancën e fundit, e cila kryhet duke zbatuar skemat dhe udhëzimet precize për ndeshjen e radhës. Përpos ndryshimeve që mund të ndodhin në mbyllje të përgatitjeve, gjasat janë që ndaj Teutës, Edgar Çani ta nisë nga stoli, kjo mbase bazuar nga përgatitjet e tij javore, por edhe paraqitja në ndeshjet e fundit.