Çyrbja: Nuk lejohen gabime, Teutës i duhen pikë

I durrsakëve shpreson në një rezultat pozitiv në transfertën ndaj Partizanit

Teuta kërkon të kthehet me rezultat pozitiv nga "Selman Stërmasi", ndonëse përballë kanë një kundërshtar të "uritur" për pikë si Partizani. Kapiteni Arbër Çyrbja, një nga lojtarët më të spikatur të Kategorisë Superiore dhe që për më tepër ka tërhequr edhe interesin e drejtuesve të Partizanit, në intervistën e dhënë për "Panorama Sport", thotë se Teuta është e detyruar për të marrë më të mirën në ndeshjet e mbetura për të arritur objektivin. "Na pret një ndeshje shumë e fortë, pasi si ne, ashtu edhe Partizani, kemi objektiva për të arritur. Pavarësisht pozicionit që kanë në klasifikim, ata janë një ekip shumë i fortë, por ne kemi nevojë jetike për rezultat dhe duhet të japim maksimumin për të dalë me pikë. Barazimi mund të konsiderohet një rezultat pozitiv, por kemi mundësi për më shumë. Shpresoj t'i shkaktojmë humbjen e parë në këtë sezon në përballjet direkte", u shpreh shijakasi, që më pas u ndal te mbijetesa. "Në lojë kanë mbetur edhe 15 pikë dhe gjithçka sa vjen e vështirësohet, ne duhet të marrim maksimumin nga këto ndeshje, në mënyrë që të sigurojmë mbijetesën, megjithatë është ende herët për të bërë parashikime, por për të arritur objektivin që kemi, ne duhet t'i marrim ndeshjet si finale", tha Çyrbja. KALENDARI - Përveç situatës jo të mirë, Teuta ka kundër edhe kalendarin, pasi ndeshet me tre kundërshtarë tepër të fortë, megjithatë ky fakt nuk i shqetëson "djemtë e detit". "Nuk ka ndeshje të lehta, nëse Lushnja konsiderohet ekip i lehtë dhe që ka rënë nga kategoria, një javë më parë barazoi me Partizanin, ndërsa ne na ka mposhtur. Pra, dua të them që duhet impenjim maksimal nga të gjithë, në mënyrë që të arrish rezultate pozitive. Kemi një grup cilësor dhe nëse japim më të mirën në fushë, jam i bindur se mund ta mposhtim Partizanin. Mungesa e tifozëve është plus për ne, pasi Partizani ka ultras të zjarrtë dhe do mundohemi ta shfrytëzojmë këtë mundësi", ka mbyllur kapiteni. Drilon Xhepollari