Nushi: Nuk ka keqmenaxhim e as vjedhje, do ketë edhe gjoba
Gentjan Nushi u jep fund që të gjitha aludimeve mbi dallaveret apo vjedhjet e përfolura te Lushnja. Në Asamblenë e fundit, nënkryetari i bashkisë ka marrë përsipër që t'u japë përgjigje akuzave të ngritura ndaj klubit dhe institucionit që ai drejton. "Në Asamblenë e vitit 2017 bëmë një shtesë fondi për ekipin e futbollit dhe ishte pikërisht ajo shumë, e cila na bëri që ne të përballonim Superioren. Është shumë e vështirë që një ekip të mbahet në elitë vetëm me të ardhurat e bashkisë. Këtë besoj se që të gjithë ne e kemi të qartë. Duke parë nivelin që kanë futbollistët në treg, ne u munduam që të merrnim të paktën minimumin e minimumit për sportistët cilësorë. Rritja e trajtimit ushqimor është pikërisht kjo. Ngjitja në Superiore na detyronte që në bazë të VKM-së për trajtimin e futbollistëve cilësorë. Por njëherësh duhet të mendonim edhe për stafin, që duhet të merrnin të ardhura, që ishin edhe më larta në krahasim me 9 ekipet e tjera. Çdo futbollist e merr trajtimin ushqimor, merr rrogën bazë, por edhe benefitet e tjera në rast fitoreje. Sipas vendimeve të marra, në rast fitoreje dhe barazime jashtë fushës. Kuptohet, që këto i përkasin vitit 2017, kur ne u mobilizuam për të bërë më të mirën e mundshme. Besoj që edhe me ndihmën e Këshillit Bashkiak, por edhe me predispozitën që ka Fatos Tushe si kryetari i bashkisë, këtij ekipi të mos i mungonte asgjë nga trajtimet bazë. Po e theksoj nga trajtimet bazë, sepse rroga minimale e një futbollisti të Superiores në të gjithë ekipet e Superiores është mbi 1 mijë euro. Ndërsa futbollistët tanë nuk marrin jo këtë shifër, por marrin afërsisht 1 milion lekë të vjetër me të gjitha trajtimet. Mund t'i shkojë kaq ndonjërit me të gjithë trajtimet e nevojshme. Jemi shumë, shumë, larg tregut që ka sporti cilësor. Kuptojmë që ishim larg, por këto ishin të vetmet mundësi që ne kemi arritur, që të gjenim futbollistët që të afroheshin me këto parà. Disa e kanë bërë edhe për ngjyrat e fanellës. Ka futbollistë lushnjarë që luajnë në Kategorinë e Parë me më pak lekë. E futëm Lushnjën në Superiore dhe kuptohet pranonin, pavarësisht ofertave që kishin nga ekipet e tjera, meqë ishin vendës. Pranuan që të luanin me gjysmat e të ardhurave. E kuptoj që është rritur ky zë shpenzimesh, por është e logjikshme. Nga Kategoria e Parë kaluam në Superiore. Që të mbajmë ekipin, prandaj e kërkuam dhe shtesën nga Këshilli Bashkiak. Prandaj dhe kemi shtuar të ardhurat dhe kemi arritur që vitin 2017 si rezultat i daljes në Superiore të jemi me bilanc pozitiv. Mirëmenaxhuam aq pak parà që të arrinim, atë që menduam ne të arrinim për më të mirën. Ndërsa pjesa e rezultateve dhe pjesa teknike është pjesë e stafeve teknike dhe e lojtarëve. Ne jo se nuk do të marrim masat tona edhe për t'i gjobitur, edhe për të kthyer ndonjë sasi të parave, të cilat nuk e justifikojnë. Këtë e kanë të shkruar në kontratë, që u mbaron në qershor. Për këtë të jenë të bindur. Hyjmë në vitin 2018. Janë gjobitur dhe do të vazhdojnë të gjobiten, atë që nuk kanë dhënë. Nëse nuk kanë dhënë, nuk do ta marrin. Futbollisti në Lushnjë paguhet sa gjysma e të gjithë futbollistëve të Superiores. Për të mos thënë që ka ekipe të Kategorisë së Parë, që mund të marrin më shumë se Lushnja. Megjithatë, pavarësisht vështirësive financiare që ka pasur Bashkia e Lushnjës, futbollin e ka parë si prioritar. I kemi qëndruar besnik. Sot që ne po flasim, me të ardhurat e bashkisë, me të ardhurat e tjera nuk kemi asnjë detyrim të prapambetur në kohë. Kemi vetëm problemet e muajit në vijim. Këto kanë qenë gjithmonë. Nuk kanë paga të papaguara, muaji i shtatë, siç mund të kenë qenë më përpara. Kanë marrë çfarë u ka takuar nga bashkia. Po shfrytëzoj rastin që kam dhe mediat këtu. Dëgjoj nëpër portale, që vidhen parà këtu, dallavere me ekipin. Nuk ka asnjë shans. Mund të auditohet. Edhe Këshilli Bashkiak, meqë janë anëtarë të Asamblesë së klubit. Çdo qindarkë e hedhur në ekipin e futbollit është e mirëmenaxhuar. Ajo që është shtesë, është në llogarinë e çdo futbollisti. Janë 25 futbollistë të federuar, të cilët marrin pagën. Të ndarë në 18 futbollistët kryesorë, që arrijnë të jenë në pjesën e lojës dhe në pjesën e rezervës. Si dhe shtatë të tjerë që përpiqen, stërviten, që të hyjnë në këtë 18-she. Stafi teknik i ka të gatshëm. Të tërë këta marrin pagën, marrin trajtimin ushqimor. Janë 2 mijë lekë në ditë, për 25 ditë në muaj. Përveç kësaj, marrin dhe në çdo udhëtim 2 mijë lekë për udhëtimin dhe hotelerinë në atë vend ku shkojnë për të luajtur. Pra, ekipit të Lushnjës nuk i ka munguar asnjë nga këto trajtime. Çdo gjë është në llogarinë e secilit futbollist. Nuk e kemi bërë as me prokurim, as me favorizim, që mund të aludohet. E gjetëm zgjidhjen, që t'i shkojë ushqim çdo futbollisti. Pastaj, ai ta zgjidhë në mënyrën e vet. Ta shpenzojë për mënyrat e veta. Pra, trajtohet si futbollist cilësor. Ka një normë që merr ushqimin, ka një normë që merr medikamentet. Ka një normë tjetër që duhet të jetë përkujdesje maksimale. Unë jam dakord me gjithsecilin, por duhet të vendosim, që kemi si prioritet ta mbajnë ekipin në këto nivele apo duhet ta lëmë që të iki poshtë. Ta lëmë në një 'statukuo' që pak e pëlqejnë. Por, të gjithë thonë pastaj e ka fajin bashkia", përmbyllte fjalën e tij nënkryetari. Alban Alushi