Vllaznia B ndal bojkotin, arrihet akordi për pagat
Lojtarët marrin garanci nga administratori Gjyrezi për t'u shlyer
Zhurma e krijuar ditët e fundit në lidhje me Vllazninë B dhe bojkotimin e stërvitjes nga futbollistët e saj ka marrë fund ditën e djeshme. Gjatë paradites, një pjesë e mirë e lojtarëve kanë qenë në stërvitje, ndërkohë që më pas ata i janë drejtuar zyrave të klubit Vllaznia ku, siç dihet, ishte programuar një takim me administratorin Astrit Gjyrezi. Mes palëve mësohet se është arritur marrëveshja dhe çdo gjë tashmë i është kthyer normalitetit. Kjo gjë është pranuar edhe nga mesfushori i kësaj skuadre, Suad Bega, në një prononcim të dhënë për mediat, menjëherë pas daljes nga zyrat e klubit. Ai tha se Gjyrezi u ka premtuar në takim që do të marrin pagat e prapambetura. Ndërkohë, sipas tij, kjo ndërprerje e stërvitjes nuk do të ndikojë në ndeshjen e së shtunës ndaj Tërbunit të Pukës. AKORDI - "Takimi i zhvilluar me administratorin e klubit besoj se ia arriti qëllimit. Ai na premtoi se po bëhet çmos për likuidimin e pagave të prapambetura sa më shpejt të jetë e mundur. Në këto kushte, pasi kemi marrë edhe sqarimet e duhura, kemi vendosur që t'i rikthehemi stërvitjes dhe nga nesër të gjithë futbollistët do të jenë në fushë. Nuk besoj se stërvitja jo e plotë gjatë këtyre ditëve do të ndikojë në formën tonë, sepse ne jemi profesionistë dhe do të japim më të mirën në fushë të shtunën ndaj Tërbunit. Vllaznia B është e vendosur për ta fituar këtë ndeshje dhe besoj se do ia dalim", u shpreh Bega në prononcimin e tij për mediat pas takimit të djeshëm. Ekipi, ndërkohë, pasdite ka zhvilluar edhe një seancë të dytë, në të cilën kanë marrë pjesë të gjithë futbollistët. Senad Nikshiqi