Dëmtohet në stërvitje, Sukaj tremb shkodranët

Vllaznia/ “Ethet” e mbijetesës, shkodranët duan pikë ndaj Flamurtarit

Vllaznia është e gjitha nën "ethet" e mbijetesës. Ashtu si një vit më parë lufton për të shpëtuar, megjithatë kur kanë mbetur edhe 5 ndeshje nga fundi, po bëjnë çmos që të shmangin rrezikun. Tashmë nuk duan që ta lënë gjithçka në dorë fatit, ndaj të besuarit e Ernest Gjokës janë mobilizuar për të marrë pikë në Vlorë. Përballja me Flamurtarin konsiderohet përcaktuese për vazhdimësinë, ndaj edhe kuqeblutë janë përqendruar prej ditësh për të përgatitur këtë 90minutësh. E rëndësishme është që të mos dalin pa pikë nga kjo transfertë, por sigurisht që objektiv parësor do të jetë fitorja. Me kontingjentin e plotë, shpresat shtohen ndjeshëm. Duke përjashtuar Antonio Markun që vazhdon rehabilitimin pas operacionit apo edhe problemet që ka shfaqur Kalaja (i cili nuk u stërvit fare dje), pjesa tjetër do të jetë e gjitha nën urdhrat e Gjokës. Nuredin Orelesi do të rikthehet si titullar, duke i dhënë shumë më shumë garanci defensivës. Vllaznia udhëton me ide të qarta në qytetin bregdetar, ndaj detyra kryesore mbetet e mbrojtjes dhe portierit Sherri, që nuk duhet të pësojnë. Por kjo nuk do të thotë që do të jenë të tërhequr gjatë gjithë 90minutëshit, përkundrazi. Stafi teknik nuk ka ngurruar që të japë porosi në këtë drejtim, ndaj shpresohet që me anë të kundërsulmeve apo edhe aftësive të lojtarëve të veçantë të shënojnë. Duhet theksuar se seanca e djeshme u zhvillua në stadium. Më kërkesë të Gjokës, duket se drejtuesit e "Loro Boriçit" vendosën që të lejojnë ekipin dje të stërviteshin në kushte optimale. Terreni i mirë i ndihmoi edhe më shumë shkodranët që të aplikonin strategjinë, të cilën do ta vendosin në zbatim ndaj Flamurtarit.