Bajerni nuk fal, por Levandovski fyen Hejnkesin
Sulmuesi polak shënon dhe zëvendësohet nga Hejnkes, të cilit refuzon t'i japë dorën
Nga polemikat e Champions- it te stërvitja në Bundesligë. Në javën e parafundit të kampionatit, Bajerni gjen pak nga buzëqeshja e humbur pas eliminimit të kontestuar në gjysmëfinale kundër Realit. Shija e hidhur e largimit nga Europa dhe zemërimi për gabimet arbitrave në ndeshjen kundër spanjollëve, nuk i shpërqendrojnë kampionët e Gjermanisë. Që pavarësisht disavantazhit fillestar me skuadrën e fundit në klasifikim dhe të rënë tashmë, Këlnin, në fund përfundon ashtu si në 5 ndeshjet e fundit të rekordmenëve në kampionat: me fitoren e skuadrës së Hejnkesit. Një 3-1 me përmbysje e firmosur e gjitha nga bavarezët: sepse edhe goli i Këlnit në minutën e 30-të erdhi prej një autogoli të Niklas Zyles (i treti për qendërmbrojtësin këtë sezon, duke barazuar rekordin historik të Bundesligës, i cili i përkiste deri dje Manfred Kalcit 1977/78). Ndërsa për golat e vërtetë të Bajernit mendojnë Hames Rodrigez, i zakonshmi Robert Levandovski dhe Korentë Toliso. Protagonisti kryesor në të mirë dhe në të keqe është gjithnjë sulmuesi polak. Në radhë të parë, për golin e 29-të në kampionat (në po kaq ndeshje), i cili i lejon të arrijë Imobilen në vendin e tretë të klasifikimit të "Këpucës së Artë" (përpara ka Mesin me 32 dhe Salahun me 31) dhe braktisjen e fushës, ku nuk preferoi t'i jepte dorën Hejnkesit. Një gjest që i shton më shumë zërat e merkatos që e shohin gjithnjë e më shumë larg Bajernit. Por, pavarësisht polemikave, shifrat e Levës janë gjithnjë e më të frikshme: 40 janë golat e tij sezonalë në
harkun e 46 ndeshjeve. Pastaj 105 gola në Bundesligë me fanellën e Bajernit dhe 180 në total në karrierë. Një gol që i lejon të afrohet në -1 nga vendi i gjashtë i shënuesve më të mirë të historisë, të cilin e mban legjenda e Leverkusenit, Ulf Kirshten. Polaku mund
të kishte shënuar edhe në fund të pjesës së parë, po të mos kishte qenë mrekullia e portierit Timo Horn: 25vjeçari është një nga 4 lojtarët e Këlnit, së bashku me Hektor, Hëger dhe Rize, që i kanë premtuar besnikëri klubit edhe në Bundesligën 2.