Shpërdoron Kamza, Luftëtari: Na kërcënuan
Pika kënaq bluzinjtë, "blindojnë" vendin e tretë për Europën
Një portier grek bën heroin në KamzaLuftëtari. Është 36 vjeç dhe është futur në histori si futbollisti i parë grek që luan në kampionatin shqiptar. Bëhet fjalë për Kristos Athanasopulos, që dje priti një penallti dhe mbajti në lojë Luftëtarin, për të dalë me një pikë të çmuar nga Kamza. Skuadra e Julian Ahmatajt...
Një portier grek bën heroin në KamzaLuftëtari. Është 36 vjeç dhe është futur në histori si futbollisti i parë grek që luan në kampionatin shqiptar. Bëhet fjalë për Kristos Athanasopulos, që dje priti një penallti dhe mbajti në lojë Luftëtarin, për të dalë me një pikë të çmuar nga Kamza. Skuadra e Julian Ahmatajt shpërdoroi një shans të artë për të qëndruar e qetë në luftën për mbijetesë, për më tepër në prag të "finales" me Vllazninë në Shkodër. Stevan Raçiç u aktivizua në pjesën e dytë, pasi fitoi një penallti, më pas goditi po vetë, por nuk arriti të mposhte portierin e Luftëtarit, që grushtoi mrekullisht. Skuadrat vuajtën më shumë se duhet mungesat, teksa Kamza ishte pa golashënuesin më të mirë, Sebino Plaku, ndërsa Luftëtari luajti pa Kristal Abazajn dhe brazilianin Xhekson Ferreira. Në fund barazimi pa gola kënaqi më tepër gjirokastritët, të cilët përfitojnë edhe nga hapi fals i Partizanit ndjekës, duke thelluar edhe më shumë diferencën, që tashmë shkon +5. Bluzinjtë "blindojnë" në këtë mënyrë vendin e tretë dhe kanë shansin e madh që në mesjavë të sigurojnë në një farë mënyre këtë pozicion, pasi luan ndaj Partizanit ndjekës. Kamza rikthehet të shohë makthet e rënies, pasi ky barazim e lë me vetëm dy pikë më tepër se Teuta dhe Vllaznia.
PJESA E PARË
Hasan Lika kishte bërë disa ndryshime në mbrojtje, i detyruar edhe nga mungesa e Xheksonit. Në krahun e majtë konfirmohej Demo, ndërsa si titullar në qendër rikthehej kapiteni Beqiri. I spostuar për të bërë rolin e Abazajt ishte vendosur Lejdi Liçaj në krahun e djathtë të mesfushës. Si titullar rikthehej edhe Vasil Shkurtaj në sulmin bluzi. Ndërsa te Kamza binte në sy aktivizimi në qendër të mbrojtjes i brazilianit Arrabal, që arriti të markonte mjaft mirë Shkurtajn. Në majën e sulmit ishte preferuar Fili, ndërsa Raçiç e niste nga stoli. Fillimi e gjeti Kamzën më kërkuese, që përmes një ish-i të Luftëtarit si Vangjel Zguro, synon të çajë gjirokastritët me inkursionet nga krahu i majtë. Rroca jep sinjalin e parë në portën e Kamzës, por Avdyli bën mrekullinë, duke evituar një gol të sigurt. Pas minutës së 20-të janë vendësit që diktojnë në lojë, duke bllokuar mesfushën. Fili
ka dy raste të mira për të shënuar, por goditjet me kokë nuk janë arma e tij e preferuar. Gjirokastritët e kanë shumë të vështirë për të shkuar te porta e Kamzës, falë edhe një mbrojtjeje të hekurt të vendësve, që mbajnë larg zonës treshen Rroca-Bregu-
Shkurtaj, me dy të fundit krejtësisht jashtë formës. Pavarësisht përpjekjeve të Kamzës për të shënuar, pjesa e parë u mbyll me rrjeta të paprekura. PJESA E DYTË Skuadrat e nisin me të njëjtat formacione. Duket si një "deja vu", pasi Kamza ka më shumë grintë dhe arrin të rrezikojë portën e Luftëtarit. Zguro i afrohet golit pas një goditjeje tokazi, ndërsa rastin më të mirë e humbet Fili, që pak metra larg portës godet jashtë. Lika nxjerr nga fusha Shkurtajn për të forcuar mesfushën, duke aktivizuar brazilianin Aurelio me Rrocën, që spostohet në rolin e një sulmuesi. Është ky i fundit që pas një goditjeje dënimi për pak sa devijon topin në rrjetë. Ahmataj hedh në fushë Raçiçin dhe menjëherë serbi bëhet protagonist, duke fituar një penallti. Mirëpo, nga pika e bardhë nuk tregohet i saktë, por edhe për meritë të portierit Athanasopulos, që i kupton krahun dhe grushton. Fundi është i dëshpëruar për vendësit, me Fukuin që humbet një rast të artë dhe katër minutat shtesë që nuk prodhojnë asgjë. Gjithçka mbyllet 0-0.